<p style="text-align: justify;">جلال اباد (پژواک، ۱۱ غبرګولی ۱۴۰۱): په ننګرهار کې د کرکټ بورډ ادارې له لوري، د ختیځ زون معلولینو لوبډلې لپاره د لوبغاړو غوراوي په موخه، د معلولینو ترمنځ د کرکټ سیالۍ پیل شوې.</p>
<p style="text-align: justify;">په دغو سیالیو کې - چې د ننګرهار، کونړ، لغمان او نورستان لوبډلې لوبېږي - د ختيځ زون د معلوليت لرونکو لوبډلې لپاره غوره لوبغاړي په ګوته کېږي چې بيا به د هېواد په کچه لوبې ترسره کوي.</p>
<p style="text-align: justify;">د غوراوي دغه لوبې، نن (د غبرګولي ۱۱مه) د جلال اباد ښار د بهسودو په کرکټ لوبغالي کې پيل شوې چې څلور ورځې به دوام کوي.</p>
<p style="text-align: justify;">د ننګرهار د کرکټ بورډ مسوول نعمتالله عالم پژواک اژانس ته وويل، دغه سيالۍ د ننګرهار، کونړ، لغمان او نورستان د معلولينو کرکټ لوبډلو ترمنځ پيل شوې چې موخه يې د زون لوبډلې لپاره د غوره لوبغاړو ټاکل دي.</p>
<p style="text-align: justify;">دی وايي، مخکې به د لوبغاړو ټاکلو پروسې ته ١٥ ورځنی کمپ جوړېده چې تر ډېره به پکې د لوبغاړو ټاکنه ناسمه کېدله؛ خو اوس کرکټ بورډ پرېکړه کړې چې د دا ډول سياليو له لارې به لوبډلو ته وړ کسان غوره کېږي.</p>
<p style="text-align: justify;">نوموړی وايي: «د جون په لسمه خوست کې د معلوليت لرونکو وګړو جام ترسره کېږي چې د زونونو لوبډلې به پکې برخه اخلي، دغو سياليو کې به د ملي لوبډلې لپاره شل لوبغاړي په نښه کېږي.»</p>
<p style="text-align: justify;">بلخوا معلولیت لرونکي لوبغاړي هم خوښ دي چې د لوبو زمينه ورته برابره شوه.</p>
<p style="text-align: justify;">د دوی له ډلې د ننګرهار د معلولينو لوبډلې کپتان محمد اشرف پژواک ته وويل، په دغو سياليو کې به هره لوبډله درې لوبې کوي چې لوبغاړي به د وړتیا په ښودلو سره ملي لوبډلې ته ځان رسوي.</p>
<p style="text-align: justify;">د ننګرهار د کرکټ بورډ مسوولين وايي، سږ کال يې منظم پلان جوړ کړی چې پر اساس به یې د بېلابېلو قشرونو کرکټ لوبډلې جوړوي او د لوبو زمينه به ورته برابروي.</p>
