ګردېز (پژواک، ٢٥ غبرګولى ۱۴۰۱): د پکتيا ولايت د څکمنيو او جانيخېلو اوسېدونکي د دغو ولسواليو ترمنځ لويې لارې د اساسي جوړولو غوښتنه کوي، وايي چې دا مهال د دغې لارې خرابوالي له امله له ګڼو ستونزو سره مخ دي.
یاده لار ۲۳ کیلومتره اوږدوالی لري چې د څمکنيو او جانيخېلو ترڅنګ، شاوخوا پنځه ولسوالۍ او خوست ولايت سره نښلوي.
د څمکنيو ولسوالۍ يوه قومي مشر حاجي نېکمحمد پژواک خبري اژانس ته وويل: «د جانيخېلو او څمکنيو ترمنځ لويه لار چې له کلونو کلونو راهيسې يې له خلکو سره د جوړولو وعدې شوې دي، خو نه په تېر نظام کې چا ورته پاملرنه وکړه او نه هم په نوي نظام کې يې چا په اړه اقدام وکړ.»
نوموړی وايي، دغه لار د څمکنيو او جانيخېلو ترڅنګ پنځه نورې ولسوالۍ هم له خوست ولايت سره نښلوي چې هره ورځ پرې زرګونه کسان تګ راتګ کوي.
نېکمحمد له نوي نظامه غواړي چې د یادې لارې په جوړولو کې دې عملي اقدام وکړي، څو خلک له ستونزو خلاص شي.
دغه راز د جانيخېلو ولسوالۍ اوسېدونکي نورمحمد منګل پژواک ته وويل چې اوسمهال د يادې لارې د اساسي جوړلو لپاره ښه زمينه برابره شوې او په وينا يي هيڅ امنيتي او بله ستونزه هم نشته چې د کار پر وړاندې د خنډ او ځنډ لامل شي.
د هغه په خبره، پر دې لويه لار هره ورځ زرګونه کسان تګ راتګ کوي چې د لارې د ډېرې خرابوالي له امله له سختو ستونزو سره لاس او ګريوان دي.
منګل وويل، د یادې لارې د پخولو منظوري په تېر نظام کې د ټولګټو چارو وزارت په چوکاټ کې شوې وه خو د امنیتي او ځینو نورو ستونزو له امله چارې پېل نه شوې.
د يادو ولسواليو يو شمېر نورو اوسېدونکو هم ورته څرګندونې وکړې او له حکومته يې د دغه سړک د جوړولو غوښتنه وکړه.
بلخوا، د پکتيا چارواکي هم د جانيخېلو - څمکنيو لارې جوړول يوه جدي اړتيا بولي.
د جانيخېلو ولسوال قاري شوکتالله پژواک ته وويل: «د دغه سړک د جوړولو په برخه کې د خلکو غوښتنې پر ځای دي او مونږ هم له ولايت مقام او نورو ادارو سره دغه ستونزه شريکه کړې ده او د هغوی له لوري هم ډاډ راکړل شوی چې دغه سړک به په پاخه او اساسي ډول جوړوي.»
نوموړی وايي، اوسمهال نظام نوی دی او ډېرې اداري ستونزې يې پر مخ پرتې دي چې د دغو ستونزو په لرې کېدو سره به د بيارغونې کارونه هم چټک شي.
شوکت زیاتوي چې د جانيخېلو - څمکنيو ولسواليو د لارې تړون او سروې هم شوې چې دوی به يې د بودجې او بيا پيل لپاره هلې ځلې وکړي.
د يادونې ده، په پکتيا کې نه يوازې د جانيخېلو – څمکنيو ولسواليو ترمنځ لارې د جوړولو چارې نه دي ترسره شوې، بلکې په دغه ولايت ځیني نور لوی او واړه سړکونه هم شته چې د جوړولو چارې يې نیمګړې پاتې دي.
