ننګرهار کې دیني مدرسې ته ځانګړې شوې درې پوړیزه ودانۍ ګټې اخیستنې ته وسپارل شوه

[restrict paid=”true”]
جلال‌اباد (پژواک، ۳۰ غبرګولی ۱۴۰۱): د ننګرهار مرکز جلال‌اباد ښار کې د يوه خيريه بنسټ له لوري د ۸۰زره امريکايي ډالرو په لګښت، دیني مدرسې ته ځانګړې شوې درې پوړېزه ودانۍ ګټې اخیستنې ته وسپارل شوه.

په دې مدرسه کې – چې نن د غبرګولي په ۳۰ مه د جلال‌اباد ښار په شپږمه ناحيه کې پرانېستل شوه – لږ تر لږه ۱۴۰۰ کسانو ته به د ديني زده‌کړو زمينه برابره شي چې نيمايي به يې نجونې وي.

د مدرسې د جوړېدو او راتلونکی ټول لګښت د منظور رضوان هاشمي خيريه بنسټ له لوري ورکول کېږي.

د دغه بنسټ مرستيال ساجد هاشمي وويل، پر مدرسې څه باندې ۸۰زره ډالر لګښت راغلی او په درېيو پوړونو کې جوړه شوې ده.

دی وايي: «لومړي منزل کې به يې نجونې زده کړې کوي، يو منزل يې د نارينه زده‌کوونکو لپاره او درېيم پوړ يې استادانو او زده‌کوونکو د اوسېدو ځای او ليليه ده. لږ تر لږه ۲۰ تنو اداري کارکوونکو او ښوونکو ته به د کار زمينه هم برابره شي چې لګښت يې موږ ورکوو.»

نوموړی وايي، په ياده مدرسه کې ۱۴۰۰ کسانو ته د زده‌کړې زمينه برابره شوې چې نيمايي به يې ښځينه او نيمايي به يې نارينه زده‌کوونکي وي او موخه يې هم د دوی کورنۍ ته د جاريه صدقې ثواب رسېدل او خلکو ته د زده‌کړو زمينه برابرول دي.

په ورته وخت کې، د سيمې اوسېدونکي د دغې مدرسې جوړېدو ته خوښ دي.

د سيمې يوه استوګن امرالله پژواک ته وويل: «دا خو ډېر سهولت رامنځته شو، نجونو ته خو بيخي د ديني زده کړو زمينه نه وه برابره، هلکان به هم ډېرو لرو ځايونو ته تلل، اوس د سيمې ټولې نجونې دغې مدرسې ته راځي.»

د مدرسې يوه زده‌کوونکي احسان‌الله له ياد خيريه بنسټ مننه وکړه چې دوی ته يې د کور په څنګ کې د ديني زده‌کړو زمينه برابره کړه.

د دغه خيريه بنسټ مسوولين وايي، نږدې وختونو کې به کابل کې هم د يوې لويې دينې مدرسې د جوړولو کارونه پيل کړي.

[/restrict]