<p style="text-align: justify;">کابل (پژواک، ۱۳ چنګاښ ۱۴۰۱): ځینو ایراني رسنیو راپور ورکړی، په دغه هېواد کې مېشت هغه افغان کډوال چې د نوملیکنې او سرشمېرنې په بهیر کې یې برخه اخیستې ده، له بانکي خدمتونو برخهمن کیدای شي.</p>
<p style="text-align: justify;">د دغو رسنیو د <strong><a href="https://www.eranico.com/fa/content/152219">راپور</a> </strong>له مخې، د ایران د کورنیو چارو وزیر احمد وحیدي دغه موضوع د بهرنیو وګړو او کډوالو د چارو د تنظیم کمېسیون په غونډه کې - چې پرون (یکشنبه) د دغه هېواد په کورنیو چارو وزارت کې جوړه شوې وه - مطرح کړه.</p>
<p style="text-align: justify;">هغه زیاته کړه، د بهرنیو وګړو تنظیم او پېژندنه باید د هغو د ظرفیتونو سمې پېژندنې لپاره په جدي ډول پرمخ یووړل شي، له همدې امله د بهرنیو وګړو استوګنځای او اقتصادي فعالیت باید معلوم وي څو په مختلفو برخو کې دقیق سیاست چمتو او پلي شي.</p>
<p style="text-align: justify;">دا په داسې حال کې ده چې له دې مخکې د ایران داخلي رسنیو راپور ورکړی و چې د دغه هېواد د ولسمشر د لومړي مرستیال په امر، د استوګنې او املاکو د اسنادو له وړاندې کولو پرته بهرنیو وګړو ته د بانکي حساب پرانیستلو خدماتو ارایه کول شونی نه دی.</p>
<p style="text-align: justify;">د ویلو ده چې ایران په دې وروستیو کې په دغه هېواد کې د مېشتو افغان کډوالو د نوملیکنې او سرشمېرنې طرح پیل کړې وه او وروستی فرصت یې د چنګاښ میاشتې تر لومړۍ نیټې پورې و.</p>
