<p style="text-align: justify;">کابل (پژواک، ۲۱ چنګاښ ۱۴۰۱): د ازبکستان د بهرنیو چارو وزارت سرپرست ویلي، ۱۲ ورځې وروسته د شلو هېوادونو د استازو په ګډون به د افغانستان په اړه په تاشکند کې، نړیواله غونډه جوړه شي.</p>
<p style="text-align: justify;">د فارس خبري اژانس د <strong><a href="https://bit.ly/3NZ0se2">راپور</a> </strong>له مخې، په تاشکند کې د خپل خبریال په حواله راپور ورکړی چې د ازبکستان د بهرنیو چارو وزرات سرپرست وزیر ولادیمیر ناراف ویلي، دغه غونډه به د راتلونکې زمري میاشتې په درېیمه او څلورمه نېټه جوړه شي. سرچينې په دې ناسته کې د کډونوالو هېوادونو د نومونو يادونه ونه کړل.</p>
<p style="text-align: justify;">ناراف وایي، تمه ده چې د افغانستان د سرپرست حکومت یو پلاوی به په دغه نړیواله غونډه کې د افغانستان په محوریت ګدون وکړي.</p>
<p style="text-align: justify;">هغه له جزئیاتو پرته ویلي: «د طالبانو ګډون په دغه ناسته کې په دې معنا نه دي چې موږ هغوی په رسمیت پېژنو. موږ غواړو له دغه لارې خپل پیغام د دغه هېواد اوسنیو چارواکو ته ورسوو. د دې غونډې موخه دا ده چې د تاشکند د غونډې په چوکاټ کې هغو خپلې نړیوالې ژمنې عملي او په هغه کې لاسلیک شوي تړونونه ومني.»</p>
<p style="text-align: justify;">د هغه په وينا، د ازبکستان – روسيې، ازبکستان او ګاونډيو هېوادونو دريځونه يو شان دي. يعنې «طالبان» خپل مکلفيتونه پوره کړي او يو ټولشموله حکومت جوړ کړي چې د افغانستان ټولې سياسي، قومي او مذهبي ډلې پکې شاملې وي.</p>
<p style="text-align: justify;">افغان چارواکو د یادې غونډې او د ازبکستان د بهرنیو چارو د سرپرست وزیر د څرګندونو په اړه څه نه دي ویلي؛ خو دوی تر دې مخکې ویلي وو، د هېواد اوسنی نظام ټولشموله دی او د لا ټولشموله کېدو لپاره یې هڅه کوي.</p>
