اسعد اباد (پژواک، ۲۶ چنګاښ ۱۴۰۱): د کونړ د عامې روغتيا ریاست وايي چې د دغه ولایت په هغو سيمو کې يې ۳۱ ګرځنده طبي ټيمونه ګومارلي چې خلک يې له روغتيايي خدماتو بې برخې دي.
دغه ټيمونه خلکو ته په وړيا ډول روغتيايي او تغذیوي خدمات وړاندې کوي.
د کونړ د عامې روغتیا رییس مظفر مخلص پژواک ته وویل چې د روغتيا وزارت د پلان او پالیسۍ له مخې، د بېلابېلو همکارو نړۍوالو موسسو په مرسته هغو ۳۱ سيمو ته ګرځنده طبي ټیمونه وګومارل شول چې پخوا يې روغتيايي خدماتو ته لاسرسی نه درلود.
مظفر وویل: «د کونړ په ډېرو سیمو کې خلک روغتیایي مرکزونو او خدماتو ته لاسرسی نه درلود؛ موږ له يوې ارزونې وروسته د دغه ولایت په ۳۱ سيمو کې ګرځنده روغتيايي ټیمونه فعال کړي دي.»
هغه وایي، په هر ټيم کې له پنځو تر اتو ښځينه روغتياپالې هم شتون لري او خلکو ته طبي خدمات وړاندې کوي.
نوموړي زياته کړه چې له روغتيا وزارت څخه يې د کونړ خلکو ته د لا ډېرو روغتيايي خدماتو برابرېدو غوښتنه کړې ده.
ځايي خلک د حکومت له دغه اقدامه خوښ دي او وايي چې اوس يې د روغتيا په برخه کې لومړنۍ اړتیاوې تر ډېره په خپل کلي کې پوره کېږي.
د چپې درې د دیګل اوسېدونکی غلام حبيیب وايي: «زموږ څخه د ولسوالۍ روغتیایي مرکز لرې دی، کلیوالو مو نه شو کولای چې په اسانۍ سره له طبي خدماتو برخمن شي، اوس مو په سیمه کې ګرځنده روغتیایي ډله فعاله شوې نو ستونزې مو یو څه راکمې شوې دي.»
د دغه ولایت د سرکاڼو ولسوالۍ د ګنجګل درې اوسېدونکی عادل بیا وایي چې حکومت ته پکار ده چې روغتیایي خدمتونه لا ډېر کړي.
د کونړ د روغتيا ریاست د معلوماتو له مخې، اوس د دغه ولایت په بېلابېلو سيمو کې ۷۶ روغتيايي مرکزونه فعال دي او خلکو ته طبي خدمات وړاندې کوي.
غړيYou need to subscribe to view the full article. Please login or register a new account.
