کابل (پژواک، ۱۲ زمری ۱۴۰۱): اروپايي ټولنه وایي، د ایمن الظواهري د وژلو اعلان د کابل پر نیت شکونه راپورته کړي، خو کابل یو ځل بیا وایي، پر خپلې دغې پالیسۍ چې د افغانستان خاوره د نورو هېوادونو پر خلاف نه کارول کېږي، کلک ولاړ دی.
وړمه شپه د امريکا ولسمشر جو بايډن وويل چې ایمن الظواهري درې ورځې مخکې د کابل په شېرپور سیمه کې د امریکا د بېپیلوټه الوتکې په برید کې وژل شوی دی.
د افغانستان سرپرست حکومت پرته له دې چې د ايمن الظواهري د وژلو په اړه څه ووايي، په شېرپور کې يې د امريکا د بېپيلوټه الوتکې بريد تاييد کړی او دا يې د دوحې له تړونه سرغړونه بللې ده.
د ریاستالوزرا دویم مرستیال مولوي عبدالسلام حنفي په يوه ويډيويي کلپ کې – چې نن خپور شوی ـ ويلي: «دغه موضوعات تر اوسه موږ ته معلوم نه دي، صرف دغه يو شی موږ ته معلوم دی چې دلته هوایي بريد شوی، اسلامي امارت يې په کلکه غندي، دا زموږ د ملي حاکمیت، نړۍوالو اصولو او د دوحې موافقتنامې خلاف عمل دی.»
د هغه په وینا، د افغانستان سرپرست حکومت بیا بیا ويلي چې د افغانستان خاوره د ګاونډيو هېوادونو او نورو پر خلاف نه کارول کېږي.
دی زیاتوي: «دا د اسلامي امارت پاليسي ده، موږ پر خپله پاليسۍ کلک ولاړ يو او دا د اسلامي امارت موقف دی.»
په ورته مهال، د افغانستان لپاره د اروپايي ټولنې ځانګړي استازي توماس نیکولسن په کابل کې د القاعده د مشر وژل کېدو د خبر په غبرګون کې پر خپل ټويټر ليکلي، تېره اونۍ يې په تاشکند کې واورېدل چې د افغانستان اوسنی حکومت هڅه کوي، هغه هېوادونه او سازمانونه چې د افغانانو ملاتړ ته ژمن دي، قانع کړي چې د افغانستان پر خاوره بشپړ کنټرول لري.
د ده په وینا، د افغانستان د سرپرست حکومت چارواکو خپله دا ژمنه تکرار کړه چې افغانستان به د «ترهګرو» پر امن پټنځای نه بدلېږي او بشري حقونو ته به درناوی کوي.
هغه د پوښتنې په ډول لیکلي، ایا «طالبان» له ایمنالظواهري خبر نه وو، نه یې غوښتل او یا نه یې شو کولای چې د هغه پر وړاندې کوم عمل وکړي .
دی ادعا کوي چې د ایمن الظواهري د وژلو اعلان د کابل پر نیت شکونه راپورته کړي دي.
