حکومت: د دولتي او خصوصي بانکونو د پورونو اړوندو قضیو لپاره ځانګړې محکمه جوړېږي

<p style="text-align: justify;">[restrict paid="true"]</p>

<p style="text-align: justify;">کابل (پژواک، ۱ وږی ۱۴۰۱): د سرپرست حکومت اقتصادي کمېسیون سترې محکمې ته دنده سپارلې چې د دولتي او خصوصي بانکونو د پورونو د اړندو قضيو حلولو او ګړندي کولو په موخه يوه ځانګړې محکمه جوړه کړي.</p>

<p style="text-align: justify;">له ارګ څخه په یوه خپره شوې خبرپاڼه کې راغلي، د رياست‌الوزرا د مرستيال ملا عبدالغني برادر په مشرۍ د اسلامي امارت اقتصادي کمېسيون نوي پروګرامونه ترلاس لاندې نيولي چې موخه يې په هېواد کې د بانکي نظام پياوړتيا او د خصوصي بانکونو ملاتړ دى.</p>

<p style="text-align: justify;">سرچینې زیاته کړې، د اقتصادي کمېسیون په غونډه کې سترې محکمې ته دنده وسپارل شوه چې د دولتي او خصوصي بانکونو د پورونو د اړندو قضيو د ګړندي کولو او حلولو په موخه يوه ځانګړې محکمه جوړه کړي.</p>

<p style="text-align: justify;">په خبرپاڼه کې راغلي، تر هغه وخته چې د علومو اکاډمۍ په مشرۍ اسلامي بانکولۍ پورې اړوند سندونه بشپړېږي، په افغانستان کې ټول دولتي او خصوصي بانکونه د «مضاربې، مرابحې، سلم او …» د اسلامي پورونو د وړاندې کولو بهير د افغانستان بانک د شرعي بورډ له اجازې وروسته د اسلامي شريعت په رڼا کې پيل کړي.</p>

<p style="text-align: justify;">سرچینې زیاته کړې، په دې غونډه کې د بهرنيو چارو وزارت مؤظف شو چې په ګاونډيو او د سيمې نورو هېوادونو کې د افغانستان د بانکونو له خوا د بانکي حسابونو د پرانيستلو لپاره کار او هڅې پيل کړي.</p>

<p style="text-align: justify;">په یاده غونډه کې سپارښتنه شوې چې د بهرنيو چارو وزارت له مرستندويو هېوادونو او موسسو سره هوکړې ته ورسېږي څو د مرستو پيسې د يوه ځانګړي بانک پرځاى په يو منظم جوړښت کې د افغانستان  نورو خصوصي بانکونو ته هم حواله شي چې په دې ډول له خصوصي بانکونو سره په چلند کې عدالت تامينېږي.</p>

<p style="text-align: justify;">اقتصادي کمېسیون ویلي، د دولتي تضمينونو، تعرفو او د دولتي کارکوونکو د معاشونو په اجرا کولو کې د خصوصي بانکونو ونډه باید زياته شي او افغانستان بانک دې د ماليې وزارت په مرسته خصوصي بانکونو ته وديعه ورکړي.</p>

<p style="text-align: justify;">په خبرپاڼه کې راغلي، دولتي او خصوصي بانکونه او نور اړوند بنسټونه دې په افغانستان کې د اسلامي بانکولۍ  د لوړولو په مقصد د اسلامي هېوادونو له تجربو څخه استفاده وکړي.</p>

<p style="text-align: justify;">په خبرپاڼه کې زیاته شوې چې د افغانستان محکمې دې د جایدادونو او ملکیتونو د شرعي قبالو د اجرا لړۍ پیل کړي.</p>

<p style="text-align: justify;">دغه‌راز د اقتصادي کمېسیون په غونډه کې ویل شوي، د مالیې وزارت دې ټولې هغه سترې زېربنایي پروژې چې د کارونو ډېره برخه یې بشپړه شوې او لږې بودجې ته اړتیا لري، تشخیص او اقتصادي کمېسیون ته راپور ورکړي.</p>

<p style="text-align: justify;">سرچینې زیاته کړې، د دولتي تضمینونو، تعرفو او دولتي کارمندانو د معاشونو په ورکړه کې د خصوصي بانکونو ونډه ډېره شي.</p>

<p style="text-align: justify;">[/restrict]</p>