<p style="text-align: justify;">[restrict paid="true"]</p>
<p style="text-align: justify;">اټلانټا (پژواک، ۵ وږی ۱۴۰۱): د امریکا د نیویارک ښار یوې محکمې د افغانستان بانک د کنګل شویو شتمنيو د قضیې په اړه ویلي چې دا پیسې دې د سپټمبر د ١١ مې پېښې د قربانیانو کورنیو ته نه ورکول کېږي.</p>
<p style="text-align: justify;">که څه هم په امريکا کې تېره مياشت یو شمېر کورنیو ویلي وو چې دوی دا پیسې نه غواړي؛ خو نورو بیا د افغانستان پر شتمنۍ دعوه کړې وه چې ګواکې دوی ته دې د یادو بریدونو د تاوان په توګه ورکړل شي.</p>
<p style="text-align: justify;">د ۲۰۰۱ زېږدیز کال د سپټمبر په ١١مه، د امریکا په بېلابېلو سیمو کې د الوتکو له لارې بریدونه وشول چې له امله یې شاوخوا ۳زره کسان ووژل شول.</p>
<p style="text-align: justify;">د دغو بریدونو مسوولیت القاعده ډلې واخیست چې له امله یې امریکا بيا پر افغانستان برید وکړ.</p>
<p style="text-align: justify;">تېر کال په افغانستان کې د جمهوریت تر سقوط وروسته امریکا د افغانستان د مرکزي بانک شاوخوا نهه میلیارده ډالره شتمني کنګل کړه.</p>
<p style="text-align: justify;">څو میاشتې مخکې بیا ولسمشر بایډن اعلان وکړ چې غواړي له دغو پیسو څخه ۳،۵ میلیارده ډالر یې د سپتمبر د قربانیانو کورنیو ته ورکړي.</p>
<p style="text-align: justify;">د ګلوبل نیوز په نامه امریکایي رسنۍ د وږي په پنځمه خبر ورکړی چې د نیویارک د یوې محکمې قاضي پرون د جمعې په ورځ د یادې قضیې په تړاو ویلي چې د سپتمبر ١١ مې پېښې د قربانیانو کورنۍ د افغانستان بانک د شتمينو ترلاسه کولو مستحق نه دي.</p>
<p style="text-align: justify;">د يادې محکمې قاضي سارا نیټبرن ویلي، یادې پیسې د افغانستان بانک ملکیت دی او بل چاته نه ورکول کېږي.</p>
<p style="text-align: justify;">دې زياته کړې: «د افغانستان بانک د امریکایي محاکمو د صلاحیتونو له ساحې څخه بهر دی او د افغانستان بانک شتمني د تاوان په توګه د یوولسم سپتمبر د قربانیانو کورنیو ته ورکول، د طالبانو حکومت په رسمیت پېژندلو په معنى ده.»</p>
<p style="text-align: justify;">هغې زیاته کړې چې د افغانستان بانک د شتمنیو په اړه پرېکړه باید په «بیړه» ونه شي.</p>
<p style="text-align: justify;">د نوموړې په وینا، د سپټمبر د یوولسمې پېښې د قربانیانو کورنۍ له کلونو راهیسې د عدالت او تاوان غوښتنې کړي او مستحق هم دي، خو قانون دغه کار محدود کړی دی او د دغه قانون له مخې، د افغانستان بانک شتمني د محکمې له واکونو ډېر پورته کوي.</p>
<p style="text-align: justify;">د راپور له مخې، د دې قاضي سپارښتنې د یوه بل لوړ قاضي له خوا ارزول کېږي چا چې د یوولسم سپټمبر پېښې د قربانیانو دوسیې څیړلې، هغه د دې واک لري چې څه ډول پرېکړه کوي.</p>
<p style="text-align: justify;">دا په داسې حال کې ده چې تېره میاشت د سپټمبر د یوولسمې نېټې بریدونو د قربانیانو یو شمېر کورنیو د امریکا ولسمشر جو بایډن ته په یوه استولي لیک کې غوښتنه کړې وه چې یادې پيسې دې دوی ته نه، بلکې افغانانو ته ورکړي.</p>
<p style="text-align: justify;">هغوی زیاته کړې چې دا پيسې د افغان ولس دي او هغوی ورته ډېره اړتیا لري.</p>
<p style="text-align: justify;">دوی ویلي : «دغه کار اخلاقاً جواز نه لري چې د افغانانو پیسې دې موږ ته راکړی شي.»</p>
<p style="text-align: justify;">په دې وروستیو کې د امریکا حکومت پرېکړه وکړه چې د افغانستان له شتمنۍ څخه درې نیم میلیارده ډالر د بشري مرستو لپاره افغانستان ته ورکړي او په دې موخه یې د افغانستان له سرپرست حکومت سره په قطر او ازبکستان کې دوه ځلې مذاکرات هم وکړل.</p>
<p style="text-align: justify;">خو وال سټریټ ژورنال خبر ورکړی چې په کابل کې د امریکا له خوا د القاعدې د مشر ایمن الظواهري تر وژل کېدو وروسته امریکا له دې پرېکړې په شا شوې ده.</p>
<p style="text-align: justify;">خو پرون یو ځل بیا امریکایي رسنیو خبر ورکړی چې سپینه ماڼۍ غواړي له کابل سره پر دې موضوع خبرې پیل کړي.</p>
<p style="text-align: justify;">[/restrict]</p>
