فیروزکوه (پژواک، ۲۴ وږی ۱۴۰۱): د غور د لعل و سرجنګل ولسوالۍ ځيني اوسېدونکي د څښاک پاکو اوبو ته د نه لاسرسي له امله شکایت لري او دې ستونزې ته د رسېدنې غوښتنه کوي؛ خو یو مسوول وايي چې د ستونزې د هواري په موخه ځیني پروګرامونه لري.
د یادې ولسوالۍ اوسېدونکي وایي، د وچکالۍ او پاکو اوبو نشتوالي له امله اړ دي څو په کیلومترونو واټن ووهي او د څښاک لپار له چینو پاکې اوبه راوړي.
د غور د لعل و سرجنګل ولسوالۍ «اوربه ګوج» کلي یوه اوسېدونکي محمد پژواک خبري اژانس ته په خپل کلي کې د څښاک پاکو اوبو له نشتونه شکایت لري.
هغه وویل: «زه پر موټرسایکل دوه درې کیلومتره ځم، د څښلو اوبه راوړم، زموږ په کلي کې یوازې زه نه یم چې د اوبو ستونزه لرم، زموږ د کلي ټول خلک له دې ستونزې سره مخ دي، موږ پر موټرسایکل اوبه راوړو، خو ډېرې ښځې مجبورې دي چې ساعتونه مزل وکړي او پر سر باندې اوبه راوړي.»
یوازې د دغه کلي اوسېدونکي نه دي چې د څښاک اوبو له ستونزو سره مخ دي، بلکې د نورو کلیو خلک هم د اوبو له کمښت سره لاس او ګریوان دي.
د غور د لعل و سرجنګل ولسوالۍ د «تلخک» کلي یو اوسېدونکی علي ظاهر هم ورته ستونزه لري او د پاکو اوبو کمښت د دغه کلي عمده ستونزه بولي.
هغه زیاته کړه: «سږ کال وچکالي ده، ټولې چینې وچې شوې، تاسې وګورئ په تېرو وختونو کې په چینو کې اوبه وې، خو اوس وچې شوې او موږ له نورو کلیو اوبه راوړو.»
د یادې ولسوالۍ اوسېدونکي له مرکزي او سیمهییزو مسوولینو غواړي چې د څښاک اوبو ستونزې د هواري په برخه کې له هغوی سره همکاري وکړي څو له لرې ځایونو نه د اوبو راوړلو ته اړ نه شي.
له بلې خوا، د غور د لعل و سرجنګل ولسوالۍ ځيني مدني فعالان هم وایي، وچکالي او د اوبو کمښت له هره پلوه دوی له ستونزو سره مخ کړي دي.
د غور د لعل و سرجنګل ولسوالۍ یو مدني فعال حکمت لعلي وایي: «له بده مرغه سږ کال د لعل و سرجنګل ولسوالۍ خلک هيڅ اوبه نه لري، چینو چې طبیعي اوبه یې لرلې وچې شوې دي، د هغوی کښت او کرنه نه ده شوې، ټول وچ شوي او خلک آن د څښاک اوبه له ستونزو سره مخ دي.»
دی هم د حکومت له مسوولینو غواړي، څو د دوی د ولسوالۍ په لرو پرتو سیمه کې د اوبو رسونې پر پروژو کار او د خلکو ستونزو ته جدي پاملرنه وکړي.
په دغه حال کې، د غور د کلیو پراختیا ریاست مسوولین مني چې ډېر خلک د اوبو د کمښته له ستونزو سره مخ دي او لامل یې هم په یاد ولایت کې وچکالي ده.
د غور د کلیو پراختیا ریاست مطبوعاتي مسوول ذبیحالله غوثيزاده پژواک ته وویل: «له بدهمرغه د وچکالیو له ستونزو تاسې او ټول خلک په جریان کې یاست چې د یاد ولایت اوبه د کمېدو په حال کې دي، د اوبو د کمښت او وچکالۍ ستونزه یوه لویه ستونزه ده چې موږ هم په دغو شرایطو کې خپل خلک درک کوو.»
هغه وویل، هره ورځ د څښاک پاکو اوبو ستونزو ته د رسېدنې په موخه د خلکو عریضې تر لاسه کوي او هڅه کوي څو وکړای شي ورته د اړوندو موسسو په همغږۍ رسېدنه وشي.
نوموړي وویل: «د کلیو پراختیا ریاست د خپلې تګلارې مطابق همیشه هڅه کړې څو د خلکو ستونزو ته رسېدنه وشي او موږ پروګرام لرو چې په دې برخه کې کار وکړو.»
د غور د کلیو پراختیا ریاست د مسوولینو په خبره، دغې ادارې د اسلامي امارت په راتلو سره د دغه ولایت په مرکز او ولسوالیو کې د اوبو رسونې ۱۰ پروژې تطبیق کړې دي.
