کابل (پژواک، ۲۵ وږی ۱۴۰۱) د افغانستان لپاره د ملګروملتونو د ماشومانو د ملاتړ صندوق وایي، تېره اونۍ په افغانستان کې له ۱،۲ میلیون ډېرو ماشومان ته د شري ناروغۍ واکسین تطبیق شوى دی.
د افغانستان لپاره د ملګرو ملتونو د ماشومانو د ملاتړ صندوق (یونیسف) د سپټمبر په ۱۵مه په خپله ټویټرپاڼه لیکلي، تېره اونۍ د افغانستان په ۲۵ ولایتونو کې له پنځو کلونو کمعمره له یو ميلیون او ۲۰۰ زره ډېرو ماشومانو ته د شري ناروغۍ پر وړاندې د مبارزې واکسین تطبيق شوى دى.
په دغه ټویټ کې زیاته شوې، ياد کمپاین د روغتیا نړۍوال سازمان په همکارۍ ترسره شوى څو په افغانستان کې د یادې ناروغۍ په مخنیوي کې مرسته وکړي.
د یادونې ده، د روغتیا نړۍوال سازمان له خوا د زمري په ۱۹مه، په یوه خپاره شوي راپور کې راغلي وو چې د افغانستان په ټولو ولایتونو کې د شري ناروغۍ پېښو له کمېدو سره سره د دې ناروغۍ نږدې ۶۵زره پېښې ثبت شوې دي.
