کابل (پژواک، ۱ تله ۱۴۰۱): د ریاستالوزراء اقتصادي معاونیت وایي، افغانستان د منځنۍ آسيا او جنوبي آسيا ترمنځ د يوه پله حيثيت خپل کړی او په نږدې راتلونکې کې به د سیمې پر څلورلارې بدل شي.
یاده شوې اداره دا څرګندونې داسې مهال کوي چې تېره ورځ د افغانستان، ازبکستان، قرغیزستان او چين د ګډ اقتصادي دهلېز اړوند پر سوداګريزو توکو بار لومړى اورګاډى بلخ ولايت ته راورسېد.
د ریاستالوزرا اقتصادي معاونیت په خبرپاڼه کې راغلي، افغانستان له جغرافيايي اړخه په سیمه کې ځانګړی ارزښت لري او دغه هېواد د منځنۍ آسيا او جنوبي آسيا ترمنځ د يوه پله حيثيت خپل کړی دی.
په خبرپاڼه کې یادونه شوې چې له همدې امله د ګاونډیو او سیمې له هېوادونو سره د افغانستان اقتصادي او سوداګریزې اړیکې نه یوازې افغانستان ته ارزښت لري، بلکې د ګاونډیو او سیمې هېوادونو لپاره هم خورا مهمې او ګټورې دي.
سرچینې لیکلي، د سوداګریزو لارو (سړکونو او رېلپټلۍ) نشتوالی د دې سبب شوی و چې د افغانستان سوداګریزې اړیکې د سیمې او نړۍ له هېوادونو سره د حداقل په حالت کې قرار ولري، خو د افغانستان د رېلپټلۍ ادارې مسوولین وتوانېدل چې د افغانستان، ازبکستان، قرغیزستان او چین ترمنځ نوی اقتصادي دهلېز رامنځ ته کړي.
د خبرپاڼې په حواله، د دغه نوي اقتصادي دهلېز په جوړېدو سره به د افغانستان، ازبکستان، قرغیزستان او چین ترمنځ د سوداګریزو توکو تبادله زیاته شي او په لږ لګښت او کم وخت کې به د یادو هېوادونو ترمنځ انتقالېږي.
دغهراز یادونه شوې چې افغانستان به په نږدې راتلونکي کې د سیمې پر څلور لارې بدل شي.
غړيYou need to subscribe to view the full article. Please login or register a new account.
