<p style="text-align: justify;">مزارشریف (پژواک، ۵ تله ۱۴۰۱): د بلخ حوزوي روغتون مسوولین وايي، په تېر یوه کال کې ٥۴٠٠٠ کسان پر بېلابېلو جلدي ناروغیو اخته شوي دي.</p>
<p style="text-align: justify;">د بلخ حوزوي روغتون د ښکلا او پوستکي څانګې مشر ډاکټر علي اصغر ملک پژواک خبري اژانس ته وويل چې له تېر یوه کال راهیسې د بلخ حوزوي روغتون ته پر بېلابېلو جلدي ناروغیو اخته ۵۴زره کسانو مراجعه کړې ده.</p>
<p style="text-align: justify;">د هغه په وينا، له يادو کسانو څخه يوازې ١٦زره يې پر «اسکبيس» ناروغۍ اخته شوي وو چې تر ډېره درملنه یې هم شوې ده.</p>
<p style="text-align: justify;">«اسکبيس» يو ډول کوچنۍ دانې دي چې د بدن د نورو برخو ترڅنګ، د ګوتو په منځونو کې هم پيدا کېږي او لامل یې تر ډېره د حفظالصحې نه مراعتول ښودل کېږي.</p>
<p style="text-align: justify;">د ډاکټر علي اصغر ملک په خبره، که خلک پاکوالی مراعت کړي نو تر ډېره پر جلدي ناروغيو نه اخته کېږي.</p>
<p style="text-align: justify;">په ورته وخت کې، يو شمېر نور ډاکټران بیا وایي چې د خپلسرو درملو کارونه او متخصصو ډاکټرانو ته نه ورتګ د جلدي ناروغیو د پرمختګ او ډېروالي لامل کېږي.</p>
<p style="text-align: justify;">په بلخ کې د جلدي او زهروي ناروغیو ټرینر ډاکټر احمد ولید پژواک ته وويل چې په لرو سیمو کې خلک د جلدي ناروغيو په خاطر متخصصو ډاکټرانو ته مراجعه نه کوي او په خپل سر درمل کاروي.</p>
<p style="text-align: justify;">دى وايي، جلدي ناروغۍ تر ډېره په عادي کریمونو، ډیټول، صابون او شامپو تداوي کېږي.</p>
<p style="text-align: justify;">همدارنګه د بلخ د شولګرې ولسوالۍ اوسېدونکي عزیزالله پژواک ته وويل چې زوى يې پر جلدي ناروغۍ اخته دى.</p>
<p style="text-align: justify;">هغه وايي: «د زوی په ځان مې يو ډول دانې راخېژي، اوس دلته روغتون ته راغلى يم، روغتون ته په راتګ سره یې وضعیت لږ ښه شوی، ډېری درمل وړیا راکوي او د روغتون امکانات او خدمات دلته ډېر ښه دي.»</p>
<p style="text-align: justify;">د بلخ حوزوي روغتون د مسوولينو د معلوماتو له مخې، په دغه روغتون کې د تېر يوه کال پر مهال شاوخوا ۳۰۰۰ کوچني عملیات هم ترسره شوي دي.</p>
