نیلي (پژواک، ۵ تله ۱۴۰۱): د دايکنډي يو شمېر روږدي کسان او اوسېدونکي پر نشهيي توکو د روږدو د درملنې مرکزونو له نشتوالي شکايت کوي او غواړي چې بېرته فعال شي؛ خو د دغه ولايت د عامې روغتيا رياست مسوولین وايي، ډېر ژر به په نيلي ښار کې د معتادينو د درملنې ۴۰ بستريز روغتون فعال شي.
د دایکنډي ولایت د مرکز یو اوسېدونکی غلامحسین احمدي وايي، تر یو کال مخکې د نیلي په مرکز کې د حکومت له لوري پر نشهيي توکو د روږدو کسانو د درملنې ۲۰ بستریز مرکز فعال و، خو له وروستیو بدلونونو وروسته دغه روغتون غیر فعال دی.
هغه زياته کړه، که څه هم په دايکنډي کې پر نشهيي توکو د اخته کسانو شمېر مخکې هم زیات و، خو اوس د بېوزلۍ او بېکارۍ له امله د دغه ولايت ډېر ځوانان روږدي شوي چې له امله یې خلک د دغه وضعیت په اړه اندېښمن دي.
هغه زياته کړه، يو زوى يې چې ٢٤ کلن دى، مخکې یې لږ نشهيي توکي کارول، خو اوس يې کور د تل لپاره پریښی او د ډېر پوډر کارولو ته یې مخ کړې ده.
د غلامحسين په وينا، د روږدو د درملنې د مرکز نهشتون له امله دوى نه شي کولاى خپل اولادونه د نشهيي توکو له کارونې منع کړي او ډېرې کورنۍ له دې ستونزې ځورېږي.
په ورته وخت کې، په دايکنډي کې پر نشهيي توکو روږدي کسان هم په دغه ولایت کې د درملنې مرکز نشتوالى، د نشهیي توکو نه پرېښودو يوازینۍ پلمه بولي.
سیدرضا چې د دایکنډي ولایت د مرکز د «سیرک» کلي اوسېدونکی دی، له خپلې مېرمنې او درېیو اولادونو سره پر نشهيي توکو اخته دي.
هغه زیاتوي، لومړی په ایران کې روږدی شوی او اوس له شاوخوا ۲۰ کلونو راهیسې نشهيي توکي کاروي. د هغه په خبره، مېرمن يې له ۸ کلونو او دوه زامن او يوه کوچنۍ لور يې له درېيو کلونو راهيسې پر نشهیي توکو روږدي شوي دي.
دغه روږدي وويل: «له هغه وروسته چې زه په خپله په نشهیي توکو اخته شوم، نور مې کار او عوايد نه درلود، نو هر کله به چې زما د کورنۍ غړي ناروغه شول، ما به يې د درد د کمولو لپاره ترياک ورکول چې دغه کار د دې لامل شو څو د وخت په تېرېدو سره ټول په نشهیي توکو روږدي شي.»
هغه په ټينګار سره وايي، نشهيي توکو يې ژوند له لوی ګواښ سره مخ کړی، نو له همدې امله غواړي چې په کلک هوډ سره له دغه لویې ستونزې سره مخه ښه وکړي.
سيدرضا زياته کړه: «موږ پيسې نه لرو چې د روږدو کسانو د درملنې خصوصي مرکز ته لاړ شو، له حکومته غواړو چې د روږدو د درملنې روغتون فعال کړي، کنه نو د لوږې، بېوزلۍ او نشهيي توکو ته د محدود لاسرسي له امله مړه کېږو.»
په ورته مهال، په دايکنډي کې حکومتي مسوولین په نږدې راتلونکي کې د روږدو د درملنې يوه مرکز د فعالېدو خبر ورکوي.
د دايکنډي د عامې روغتيا رييس مولوي ډاکتر محمدقاسم انقیادي که څه هم د دغه مرکز د فعالېدو کره نېټه په ډاګه نه کړه، خو پژواک ته يې وويل چې ټاکل شوې راتلونکو ورځو کې د روږدو د درملنې ۲۰ بستريز مرکز، ۴۰ بسترونو ته لوړ او بېرته خپل فعالیت پیل کړي.
د هغه په وينا، دغه پرېکړه د دایکنډي د عامې روغتیا ریاست له لوري په روان پسرلي کې د افغانستان عامې روغتيا وزارت ته د دوى د مکررو غوښتنو له وراستولو وروسته شوې ده.
نوموړي څرګنده کړه، مخکې د دغه ولایت په مرکز کې د معتادینو د درملنې ۲۰ بستریز روغتون فعال و، خو د تېر کال د زمري په ۲۴ مه، د اسلامي امارت حکومت له راتلو سره د اقتصادي ستونزو له امله له فعالیته لوېدلی دی.
د ډاکتر انقیادي په خبره، د درملنې دغه مرکز مخکې د عامې روغتيا وزارت له لوري تمویلېده خو له تېر یوه کال راهيسې يې د فعاليت لپاره بودجه نه ده ځانګړې شوې.
دغهراز د دايکنډي د عامې روغتيا رييس وايي، دوى پر نشهيي توکو د روږدو کسانو سرشمېرنه پيل کړې او د لومړنيو شمېرو له مخې، په دايکنډي کې په یادو توکو د اخته کسانو شمېر د تېرو کلونو په پرتله ډېروالی ښيي.
GET IN TOUCH
NEWSLETTER
SUGGEST A STORY
PAJHWOK MOBILE APP