د پکتیکا ولایتي روغتون د بسترونو شمېر له ۷۰ څخه ۱۵۰ ته لوړ شو

ښرنه (پژواک، ۹ تله ۱۴۰۱): چارواکي وايي، د پکتیکا ولایتي روغتون د بسترونو شمېر له ۷۰ څخه ۱۵۰ ته لوړ شوی چې د چارو د عملي تطبیق لپاره یې ۴۷ نوي مسلکي کارکوونکي جذب کړي، څو د دغه روغتون په بېلابېلو څانګو کې دندې مخ ته یوسي.

د دغه ولایت د عامې روغتیا ریاست مرستیال ډاکټر محمدیعقوب پتمل پژواک خبري اژانس ته وویل، په یوه تازه ګام کې د پکتیکا ولایتي روغتون د بسترونو شمېر له ۷۰ څخه ۱۵۰ ته لوړ شوی چې له مخې یې، په دغه روغتون کې د ۵۹ نوو مسلکي کسانو جذبولو ته اړتیا ده.

دی وايي، د نوو کارکوونکو د جذب لړۍ یې پیل کړې او توانېدلی چې په لومړۍ ازموینه کې ۴۷ متخصصين، ډاکټران، اداري، تخنيکي او خدماتي کارکوونکي جذب کړي، څو د روغتون په بېلابېلو برخو کې دندې ترسره کړي.

د ده په خبره، پاتې ۱۲ نور بستونه – چې په هغو کې هم ډاکټران او متخصصين شامل دي – په نږدې وختونو کې د دویمې ازموینې له لارې ډکوي.

هغه زياته کړه، په نوو بستونو کې د کسانو د ګومارنې په پروسه کې، د رونټيا په موخه د عامې روغتيا وزارت له لوري د نظارت یوه کمېټه جوړه شوې چې مشري یې د پکتيکا ولايت د عامې روغتيا رییس کوي او په غړيتوب کې یې د ولايت مقام، عامې روغتيا رياست او ملکي روغتون کارکوونکي شامل دي.

پتمل زياتوي، په نوو کسانو کې ۳۰ سلنه ښځينه او ۷۰ سلنه نارينه متخصيصين، ډاکټران او تخنيکي کارکوونکي جذب شوي دي.

خو نوموړي روښانه نه کړه چې د دغو ۵۹ بستونو لپاره څومره کسانو نوم‌ليکنه کړې وه.

هغه وويل، د اوس لپاره د پکتیکا په ولايتي ۱۵۰ بستریز روغتون کې د جراحي، داخله، يورولوژي، نسايي او ولادي، عقلي او عصبي او نورو ناروغيو درملنه کېږي.

دی زياتوي، د ارتقأ د چارو له عملي تطبيق وروسته به په ياد روغتون کې د جراحي، داخله ناروغيو، نسايي او ولادي او جلدي ناروغيو لپاره څانګې بېلې کړي او په جلا جلا وارډونو کې به د یادو ناروغيو درملنه ترسره کېږي.

بل‌خوا، د روغتون لپاره د نوو کسانو د جذب په موخه د ازموينې ګډون‌وال په دې پروسه کې د رونټيا او له دوی څخه په منظم چاپېریال کې د ازموينې له اخيستو خوښي څرګندوي او وايي، دوی به له برياليتوب وروسته په پوره صداقت د پکتیکا په ملکي روغتون کې د ناروغانو د درملنې په موخه دندې ترسره کړي.

د ازموينې یوه ګډون‌وال ډاکټر محمد نبي پژواک خبري اژانس ته وویل: «ازموينه په پوره رونټيا واخیستل شوه، زه د داخله ناروغيو څانګې ته بريالی يم او ډاډ ورکوم چې خپله دنده به په پوره ايمانداري ترسره کوم.»

د يادونې ده، تر دې وړاندې د پکتيکا په ولایتي ملکي روغتون کې ۱۱۸ متخصيصينو، ډاکټرانو او اداري کارکوونکو دندې تر سره کولې چې ۱۵۰ بسترونو ته له ارتقا وروسته به یې د ټولو کارکوونکو شمېر ۱۷۷ کسانو ته ورسېږي.