[restrict paid="true"]
کابل (پژواک، ۱۲ تله ۱۴۰۱) : ارګ وایي چې د ریاستالوزراء اقتصادي مرستیال ملا عبدالغني برادر اخوند په مشرۍ په ځانګړې غونډه کې پرېکړه وشوه، چې د ژمي لپاره به نوي ځنګلونه نه وهل کېږي او پخواني وهل شوي به بازار ته عرضه کېږي.
له ارګ څخه په یوه خپره شوې خبرپاڼه کې راغلي، د ریاستالوزراء اقتصادي مرستیال ملا عبدالغني برادر اخوند په مشرۍ په ځانګړې جوړه شوې غونډه کې په را روان ژمي کې د سون توکو د بیو پر کنټرول مفصلې خبرې وشوې.
سرچینې زیاته کړې، په دې غونډه کې پرېکړه وشوه، چې د هېوادوالو د ژمنیو ستونزو د حل په موخه به د کرنې، اوبولګولو او مالدارۍ وزارت د نورستان، کونړ، ننګرهار، خوست، پکتیا او پکتیکا ولایتونو ځنګلونو کې هغو د سون لرګیو ته چې کلونه مخکې وهل شوي، بازار ته د داخلېدو اجازه ورکړي.
په خبرپاڼه کې راغلي، په همدې تړاو کرنې وزارت ته سپارښتنه شوې چې په یادو ځنګلونو کې به په هېڅ ډول چا ته اجازه نه ورکوي، چې ځنګلونه ووهي او که څوک پر دغه عمل مرتکب ونیول شي، د قانون منګولو ته به سپارل کېږي.
ارګ وایي، په دغه غونډه کې د کانونو او پټرولیم وزارت په مشرۍ، مالیې وزارت او کابل ښاروالۍ ته دنده سپارل شوې چې په ژمي کې ډبرو سکرو د نرخونو د کنټرول په موخه طرحه جوړه او راتلونکې ناستې ته یې وړاندې کړي.
په خبرپاڼه کې ویل شوي، په را روان ژمي کې د مایع ګاز د بیو د کنټرول او احتیاطي زېرمو درلودلو په موخه مالیې او صنعت او سوداګرۍ وزارتونو او کابل ښاروالۍ ته دنده سپارل شوې چې په دغه برخه کې د خصوصي سکټور په ملتیا د ګاز او نفتو دولتي شرکت سره په ګډه لازم تصامیم ونیسي.
د یادونې وړ ده چې هر کال د ژمي پر مهال د هېواد په سړو سیمو کې د سوند توکي او په ځآنګړې توګه د لرګیو او ګازو بیې لوړیږي .
[/restrict]
