<p style="text-align: justify;">کابل (پژواک، ۱۴ تله ۱۴۰۱): د کاناډا د کډوالو چارو وزارت وايي، له پاکستانه یې ۳۱۵ افغانان تېره ورځ په یوې چارټر شوې الوتکه کې کاناډا ته لېږدولي دي.</p>
<p style="text-align: justify;">دغه څرګندونې د کاناډا د کډوالو چارو وزیر سین فریسر (Sean Fraser) تېره شپه پر خپلې ټوېټرپاڼې <a href="https://bit.ly/3CLC9Op"><strong>لیکلي</strong></a> دي.</p>
<p style="text-align: justify;">دی وايي: «نن (د تلې ۱۳مه) یوې بلې چارټر شوې الوتکې له پاکستانه ۳۱۵ افغان کډوال د کاناډا ګلګرې ښار ته ولېږدول.»</p>
<p style="text-align: justify;">هغه زیاته کړې چې په دغه هېواد کې له یاد شمېر کډوالو سره د افغان کډوالو شمېر ۲۱ زرو ته ورسېد او هېواد یې «د خپلو ملګرو» د ملاتړ لپاره نور هم خپل کار ته دوام ورکوي.</p>
<p style="text-align: justify;">دا په داسې حال کې ده چې له دې مخکې هم له پاکستانه افغانان په چارټر شوو الوتکو کې کاناډا ته لېږدول شوي او د کاناډا حکومت په خپل هېواد کې لږ تر لږه د ۴۰ زره افغانانو مېشتولو ژمنه کړې ده.</p>
