کابل (پژواک، ۲۷ تله ۱۴۰۱): د کابل په بادام باغ کې د «معیاري کرنه، د هېواد اقتصاد تضمینوونکې» تر سرلیک لاندې د کرنیزو محصولاتو او کورني تولیداتو نندارتون جوړ شو چې څلور ورځې به دوام ولري.
په دغه نندارتون کې د کرنې، بڼوالۍ او مالدارۍ محصولات، پروسس شوي تولیدات، لاسي صنایع، کرنیز ماشینونه، زعفران، طبي بوټي او نباتات، د اوبو لګولو تجهیزات، مثمر او غیر مثمر نیالګي، د لمریزې برېښنا دستګاوې او یو شمېر کورني تولیدات نندارې ته وړاندې شوي دي.
په دې اړه په جوړو شوو مراسمو کې د ګڼ شمېر کروندګرو، بڼوالو او صنعتکارانو ترڅنګ د ریاست الوزرا اقتصادي مرستیال ملا عبدالغني برادر، اداري مرستیال ملا عبدالسلام حنفي، د کرنې وزارت سرپرست مولوي عطاالله عمري، د مالیې وزارت سرپرست هدایتالله بدري او د سوداګرۍ خونې مشر یونس مومند ګډون کړی وو.
د کرنې وزارت سرپرست مولوي عطاالله عمري وویل، په دغه څلور ورځني نندارتون کې چې نن پیل شو، ۲۶۳ غرفې شته چې ۵۶ یې د ښځو لاسي صنایعو ته ځانګړې شوې دي.
هغه زیاته کړه، د دغه نندارتون جوړولو موخه د افغانستان د کرنې سکتور پراختیا، د کورنیو تولیداتو ملاتړ، د کورنیو تولیداتو کارولو د فرهنګ دودول، د کرنې او مالدارۍ سکتور وده او پراختیا او د کروندګرو، بڼوالو او صنعتکارانو هڅونه ده.
ده هیله وښوده چې دغه نندارتون به د قراردادونو لاسلیکولو، بازارموندنې او پانګهوالو په هڅونه او جذب کې د پام وړ لاستهراوړنې ولري.
عمري یادونه وکړه، اړوند وزارت د کرنې او مالدارۍ محصولاتو ځنځیري ارزښت ته په کتو ژمن دی چې له تولید تر مصرف په ټولو پړاوونو کې بزګرانو او مالدارانو ته د بازارموندنې او خرڅلاو زمینه برابره کړي.
د ریاست الوزرا اقتصادي مرستیال ملا عبدالغني برادر وویل، د افغانستان ۸۰ سلنه خلک پر کرنې بوخت دي او له همدې لارې د خپل ژوند چارې پر مخ وړي.
دی وایي، کرنه د هېواد په اقتصاد کې ژوره رېښه لري چې دوی به د دولت په توګه ډېره پاملرنه ورته وکړي.
هغه له کرنې وزارت څخه وغوښتل چې په هېواد کې کرنه ماشیني او کروندګرو ته لازمې اسانتیاوې برابرې کړي.
نوموړي د خپلو خبرو په لړ کې یادونه وکړه، په تېر یوه کال کې سرپرست حکومت ملت ته داسې څه نه دي کړي چې د ملت قناعت پرې وشي او باید ډېر کار وشي.
هغه له بهرمېشتو افغان سوداګرو وغوښتل څو هېواد ته راشي او پانګونه وکړي.
د ریاست الوزرا اداري مرستیال عبدالسلام حنفي وویل، حکومت په پام کې لري چې د هېواد په لویو ښارونو کې سړېخونې جوړې کړې او کرنیزو محصولاتو ته په کور دننه او بهر بازار پیدا کړي.
هغه دا هم وویل چې د «اسلامي امارت» له راتګ سره په ټول هېواد کې د نشهيي توکو کښت منع شوی او د نړۍوالو اخلاقي مسوولیت جوړېږي چې د افغانستان له کروندګرو سره د بدیل معیشت په برخه کې مرسته وکړي.
د نندارتون ګډونوال خوښ دي چې خپل محصولات او تولیدات یې نندارې ته وړاندې کړي، خو غوښتنه کوي چې توکو دې یې په کور دننه او بهر بازار وموندل شي.
د عایشې صدیقي په نوم یوې صنعتګرې پژواک خبري اژانس ته وویل، په دغه نندارتون کې یې خوراکي توکي نندارې ته ایښي او تمه لري چې تولیدات یې خوښ کړای شي او مناسب بازار ورته وموندل شي.
غړي
You need to subscribe to view the full article. Please login or register a new account.
