تېرو دوو ورځو کې له ایران څخه نږدې ۵ زره افغان کډوال هېواد ته راستانه شوي

کابل (پژواک، ۹ لړم ۱۴۰۱): د کډوالو او بېرته راستنېدونکو چارو وزارت وايي، د روانې لړم میاشتې په وروستیو دوو ورځو کې له ایران څخه ۴زره ۸۲۲ افغان کډوال بېرته هېواد ته راستانه شوي دي.

دغه وزارت نن د لړم په ۹ مه، په خپله ټویټرپاڼه کې ویلي چې د لړم په ۷مه او ۸مه له ايران څخه د نیمروز د ورېښمو پله او د هرات د اسلام کلا له لارې ۴زره او ۸۲۲ افغان کډوال بېرته هېواد ته راستانه شوي دي.

وزارت په دې اړه معلومات نه دي ورکړي چې دغه کډوال په زور له ایرانه ایستل شوي او که په خپله خوښه را ستانه شوي، خو له دې مخکې دغه هېواد په زرګونه افغانان د افغانستان خاورې ته را اړولي دي.

سرچینه وایي، په راستنو شوو کډوالو کې ۱۰۴ کورنۍ- چې ۳۰۶ غړي لري- او ۲۷۰۰ مجرد وګړي شامل دي چې له دې ډلې ۴۳۲ وګړي د مرستو په موخه د کډوالۍ نړۍوال سازمان/ IOM ته ور پېژندل شوي دي.

په ورته وخت کې، د نيمروز د کډوالو چارو رياست وايي، له ایران څخه د ورېښمو پله له لارې په راستنو شوو کډوالو کې ۱۵کورنۍ- چې ۶۳ غړي لري- او ۱۱۱۳ مجرد وګړي شامل دي.

د سرچینې په وینا، له دې ډلې ۲۴ کسان د مرستو په موخه د کډوالۍ نړۍوال سازمان/ IOM ته ور پېژندل شوي دي.

د یادونې ده، د روانې لړم میاشتې په ۳مه د نیمروز د ورېښمو پل له لارې ۳زره او ۲۹۲ افغان کډوال او د همدې میاشتې په ۴مه، د هرات د اسلام کلا له لارې یو زر او ۵۸۸ افغان کډوال هېواد ته راستانه شوي دي.