کلات (پژواک، ۲۸ لړم ۱۴۰۱): د زابل په مرکز کلات ښار کې د دغه ولایت د بایسکل ځغلونې فدراسیون له لوري د بایسکل ځغلونې سیالۍ ترسره شوې چې موخه يې ورزش ته د زابلي ځوانانو هڅول بلل شوي دي.
د دغه ولایت د بایسکل ځغلونې فدراسیون مشر نثاراحمد امیري پژواک خبري اژانس ته وویل، په دې سیالیو کې د مرکز کلات ۲۰ لوبغاړو ګډون کړی و.
نوموړی زیاتوي، یادې سیالۍ د سیوري ولسوالۍ له کاټلي سیمې څخه پیل او د مرکز کلات اړوند په صحرانې سيمه کې د ۱۷ کيلومترو واټن په وهلو سره پای ته ورسېدې.
د هغه د معلوماتو پربنسټ، په دې سیاليو کې احمد ضیاء خپلواک لومړی، کریمالله همدرد دوهم او محمد ضیاء درېیم مقام خپل کړ. د دې سیالیو لومړی، دوهم، درېیم او څلورم مقام ګټوونکي به د بایسکل ځغلونې ملي ټیم ته انتخاب شي او هلته به په سیالو کې د زابل په استازولۍ ګډون وکړي.
امیري وايي، د زابل د بایسکل ځغلونې فدراسیون له لوري ټولو ګډونوالو ورزشکارانو ته کپونه، مډالونه او ستاینلیکونه ورکړل شول.
نوموړی زیاتوي، یادې سیالۍ د کلات ښار د ځوانانو هڅونې په موخه ترسره شوې، څو زابلي ځوانان لا نور ورزش په ځانګړي ډول بایسکل ځغلونې ته مخه کړي او د دوی له لوري په جوړو شویو سیالو کې ګډون وکړي.
د زابل د ورزش او بدني روزنې آمر احمد غلامي پژواک ته وویل، هڅه کوي د لوبغاړو د هڅونې لپاره په مرکز کلات او ولسوالیو کې بېلابېلې سیالۍ ترسره کړي.
نوموړی زیاتوي، تر دې وړاندې یې د فوټبال، والیبال، ازاد سیالیو ټورنمنټونه جوړ کړي وو او په پلان کې لري چې په کلات کې د شته فدراسیونونو په مټ نورې سیالۍ هم ترسره کړي.
هغه وویل، په دې وروستیو کې په زابل کې ورزش ته ډېره پاملرنه شوې چې له دې ولایت څخه یې د هېواد ګڼو ولایتونو ته په بېلابېلو برخو کې ورزشکاران لېږلي دي.
د زابل د ورزش دغه مسؤول وايي، په پام کې لري په کلات ښار کې د اس ځغلونې او نیزه وهنې سیالۍ هم جوړې کړي.
په یادو سیالیو کې ګډونکوونکو لوبغاړو خوښي وښوده او زیاته یې کړه چې باید هر کال په دغه ولایت کې ورته سیالۍ جوړې شي.
د لوموړي مقام ګټونکي لوبغاړي احمدضیاء خپلواک پژواک اژانس ته وویل، خوښ دی چې نن یې په دې سیالیو کې ګډون کړی، له څو میاشو راهیسې یې ورته چمتووالی نیولی و او هره ورځ یې تمرینونه کول.
ده غوښتنه وکړه چې د بایسکل ځغلونې فدراسیون دې د زابل ولایت د بایسکل ځغلونې ورزشکارانو ته پاملرنه وکړي او هغه ډول بایسکلونه دې ورکړي چې په نورو ولایتونو کې په رسمي ډول سیالیو کې ترې کار اخلي.
غړيYou need to subscribe to view the full article. Please login or register a new account.
