جنوبي وزيرستان کې چاودنې څلورو کسانو ته مرګ‌ژوبله اړولې

کابل (پژواک، ۲۸ لړم ۱۴۰۱): ځایي سرچینې وایي، په جنوبي وزیرستان کې د ماین چاودنې له امله درې کسان وژل شوي او یو بل ټپی دی.

د مشال راډیو د خبر له مخې، دغه چاودنه تېره ورځ د جنوبي وزيرستان د چګملي سیمې په یوه مارکېټ کې شوې ده.

په دغه سیمه کې یوه امنیتي مسوول نصرالله ویلي، دغه چاودنه په ځمکه کې د ښځ شوي ماین ده چې له امله یې درې کسان وژل شوي او یو ټپي دی.

سرچینې لیکلي: «په بمي چاودنه کې وژل شوي دوه تنه «د پاکستان حکومت ته تسليم شوي طالبان» دي او يو د اېف سي سرتېری دی.»

د دغې چاودنې مسوولیت تر اوسه کومې ډلې پر غاړه نه دی اخیستی.

په دې وروستيو کې په جنوبي وزيرستان کې د ناامنۍ پېښې ډېرې شوې او خلکو يې د مخنيوي لپاره لاريونونه او احتجاجونه هم کړي او له چارواکو يې د سيمې د امنيت ټينګولو غوښتنه کړې ده.

پاکستاني چارواکو ویلي چې د سيمې د امنيت ساتلو لپاره يې اقدامات کړي او په دې تړاو یې عملیات روان دي.