اټلانټا (پژواک، ۱۰ لېندۍ ۱۴۰۱): د فوټبال دوې پیاوړې لوبډلې جرمني او بلجیم په ګروپي سیالیو کې ونه شو کولای چې سم وځلېږي، له دویم پړاوه پاتې او له نړۍوال جام څخه بهر شول.
په قطر کې د فوټبال نړۍوال جام سیالیو په لړ کې، نن د اېف او جي ګروپونو لوبډلو ترمنځ د ګروپي سیالیو وروستۍ لوبې وشوې.
لومړۍ لوبه له اېف ګروپ څخه د کروشیا او بلجیم ترمنځ ترسره شوه چې مساوي پای ته ورسېده؛ دواړو لوبډلو ته یوه یوه نمره ورکړل شوه. د همدغه ګروپ بله لوبه د کاناډا او مراکش ترمنځ وشوه چې دوه پر یو د مراکش په ګټه پای ته ورسېده.
دغهراز مراکش په یاد ګروپ کې لومړی او کروشیا دویم مقام خپل کړ او دواړه دویم پړاو ته لاره پیدا کړه. د بلجیم لوبډله چې په نړۍواله ډلبندۍ کې دویم ځای لري، له سیالیو څخه ووتله.
د پنجشنبې په ورځ درېیمه لوبه د جاپان او هسپانیې ترمنځ وه چې دوه پر یو ګول د جاپان په ګټه پای ته ورسېده. جاپان له دغې بریا سره پخپل ګروپ کې لومړی مقام خپل کړ او دویم پړاو ته یې لاره ومونده.
د ورځې وروستۍ او مهم لوبه د جرمني او کوسټاریکا ترمنځ ترسره شوه. که څه هم جرمني دا لوبه څلور پر دوه ګولونو وګټله، خو د ګولونو د اوسط له امله له سیالیو ووتله او له دغه ګروپ څخه هسپانیا او جاپان بل پړاو ته لاره پیدا کړه.
تر اوسه په دغو سیالیو کې امریکا، نیدرلنډ، ارجنټاین، اسټرالیا، فرانسه، پولنډ، انګلستان، سینیګال، مراکش، هسپانیه، کروشیا او جاپان دویم پړاو ته لاره موندلې ده.
په دویم پړاو کې به امریکا له نیدرلنډ، ارجنټاین له اسټرالیا، فرانسه له پولنډ، انګلستان له سینیګال، مراکش له هسپانیې او کروشیا له جاپان سره لوبه کوي.
