عامې روغتیا وزارت: له پاکستانه د نږدې ۲۰۰ میلیون کلدارو په ارزښت د درملو رالېږلو لړۍ پیل شوې

کابل (پژواک، ۱۲ لېندۍ ۱۴۰۱): د افغانستان د عامې روغتیا وزارت وایي، له پاکستانه افغانستان ته د نږدې ۲۰۰ ميليون پاکستانۍ کلدارو په ارزښت د درملو رالېږلو لړۍ پېل شوې او تېره ورځ یې لومړۍ جوپه کابل ته رسېدلې ده.

د افغانستان عامې روغتیا وزارت په خپله ټوېټرپاڼه کې د یادو څرګندونو ترڅنګ لیکلي چې د پاکستان له لوري د افغانستان درېیو ځانګړو روغتونونو ته د نږدې ۲۰۰ ميليون پاکستانۍ کلدارو په ارزښت د درملو رالېږلو لړۍ پیل شوې او تېره ورځ یې لومړۍ جوپه کابل ته را رسېدلې ده.

سرچینې لیکلي، ياد درمل به د کابل علي جناح، د ننګرهار د پښتورګو درملنې ملي او د لوګر نايب امین‌الله خان روغتونونو ته په ترتيب سره پر وخت ولېږدول شي.

د يادونې ده، یاد درې روغتونونه د پاکستان له لوري جوړ شوي دي.