د زابل په شینکۍ ولسوالۍ کې د کرکټ شل‌اووریزې سیالۍ پیل شوې

کلات (پژواک، ۲۵ لېندۍ ۱۴۰۱): د زابل په شینکۍ ولسوالۍ کې د کرکټ ۸ غوره لوبډلو ترمنځ سیالۍ پيل شوې چې ۱۸ ورځې به دوام وکړي.

د دغه ولایت د کرکټ بورډ مسوول محبوب محبت پژواک خبري اژانس ته وویل، د شینکۍ ولسوالۍ د اتو غوره لوبډلو ترمنځ د کرکټ دا شل اووریزې سیالۍ د ملګرو ملتونو له ماشومانو د ملاتړ صندوق/ UNICEF په مالي ملاتړ نن پیل شوې.

هغه زیاته کړه، د دغو سیالیو له لارې به له یوې خوا د پولیو مخنیوي کمپاین وشي او له بلې خوا به ځوانانو ته د سالمې بوختیا او تفریح زمینه برابره شي.

دی وایي، په دې وروستیو کې په زابل کې کرکټ وده کړې چې د مرکز کلات ترڅنګ په شاه جوۍ، ښارصفا، سیوري، شینکۍ، شملزو، خاک افغان، مېزانه او ارغنداب ولسوالیو کې د کرکټ شاوخوا ۱۰۰ لوبډلې شته او سلګونه ځوانان کرکټ کوي.

د شینکۍ ولسوالۍ د کرکټ مسوول اسحاق خان افغان پژواک خبري آژانس ته وویل چې د کرکټ پیل شوې سیالۍ د کرکټ لوبغاړو پر روحیې او هڅونې ښه اغېز کوي.

هغه زیاته کړه، په دې ولسوالۍ کې د کرکټ ۱۷ لوبډلې شته چې ۱۸۷ لوبغاړي لري.

ده غوښتنه وکړه چې د یادې ولسوالۍ د کرکټ لوبغاړو ته دې پام وشي او د سیالیو لپاره دې معیاري لوبغالی ورته جوړ شي.

د یادې ولسوالۍ د افتخار کرکټ لوبډلې کپتان بخت‌الله پژواک خبري اژانس ته وویل، دغسې سیالۍ جوړول ښه فرصت دی څو ځوانان په دغې لوبې کې خپلې وړتیاوې وښيي.

هغه له یونیسف ادارې مننه وکړه چې دوی ته یې دا سیالۍ جوړې کړې دي او له دوی سره یې د جامو او د کرکټ نورو وسایلو مرسته کړې ده.

غړي

You need to subscribe to view the full article. Please login or register a new account.