<p style="text-align: justify;">خوست ښار (پژواک، ۳۰ لېندۍ ۱۴۰۱): شاوخوا يوه اونۍ مخکې له ۱۹ کلنو کم عمره کرکټ ملي لوبډلې لپاره د لوبغاړو غوراوي په موخه په خوست، پکتيا، پکتيکا، غزني او لوګر ولايتونو کې له لسګونه لوبغاړو ازموينه واخيستل شوه چې د کرکټ یو شمېر لوبغاړي د دغې پروسې پر روڼتیا شک لري.</p>
<p style="text-align: justify;">د افغانستان کرکټ بورډ د معلوماتو له مخې، د تېرو دوو اونيو په لړ کې د کرکټ تر ۱۹ کلنو کم عمره لوبډلې ته د لوبغاړو غوراوي په موخه د هېواد په کچه له شاوخوا ۵ زره کسانو د ازادې سيالۍ له لارې ازموينه واخیستل شوه.</p>
<p style="text-align: justify;">په خوست کې د کرکټ يو شمېر لوبغاړي دا ازموينه شفافه نه بولي او ادعا کوي چې د تېر په څېر دا ځل هم د وړ لوبغاړو حق تر پښو لاندې شوی دی.</p>
<p style="text-align: justify;">د ايمل شاهين په نوم د کرکټ یو لوبغاړی- چې له تېرو څو کلونو راهیسې د خوست په منتخبه لوبډله کې لوبېږي- وايي، دا ډول ازموينې تر ډېره نمايشي بڼه لري او لوبغاړي د شخصي اړيکو پر اساس لوبډلې ته غوره کېږي.</p>
<p style="text-align: justify;">نوموړي پژواک اژانس ته وويل، له ۱۹ کلنو د کم عمر کرکټ لوبډلې ته د غوره کېدو په موخه په وروستۍ ازموينه کې- چې شاوخوا دوه اونۍ مخکې په خوست کې واخیستل شوه- د ډېرو بااستعداده لوبغاړو حق تر پښو لاندې شوی دی.</p>
<p style="text-align: justify;">هغه وايي: «دا څو کاله کېږي چې مسلسل د خوست منتخب ټیم کې لوبېږم او ښې لوبې مې کړې دي، د کرکټ بورډ له سلېکشن کمېټې مې هیله دا ده چې زما د ښه لوبېدو حق راکړي.»</p>
<p style="text-align: justify;">د لطيف په نوم د کرکټ بل لوبغاړی هم وايي، هر ځل چې د کرکټ ملي لوبډلې او نورو لوبډلو ته د لوبغاړو د غوره کېدو په موخه ازموينه اخيستل شوې، روڼتیا ته په کې پام نه دی شوی.</p>
<p style="text-align: justify;">نوموړي له پژواک سره په خبرو کې له کرکټ بورډ څخه غوښتنه وکړه چې دا پروسه دې شفافه کړي څو د ځوانو لوبغاړو زړونه مات نه شي.</p>
<p style="text-align: justify;">دی زياتوي: «ډېر وخت کرکټ بورډ د کرکټ له لوبغاړو امتحانونه اخلي، خو نتيجه یې شفافه نه وي، يوه درغلي خامخا په کې موجوده وي.»</p>
<p style="text-align: justify;">په ورته مهال، د کرکټ مبصرین هم له ۱۹ کلنو د کم عمر لوبډلې لپاره د ازموينې اخیستو پر شفافیت نیوکه لري.</p>
<p style="text-align: justify;">د کرکټ يوه مبصر احمد پژواک ته وویل، هغسې چې په کار و دغه ازموینه نه ده اخیستل شوې او شفافیت په کې نه و.</p>
<p style="text-align: justify;">نوموړی وايي: «د څو بالونو په لوبولو نه شو کولای یو بېټسمېن یا بالر انتخاب کړو، دا پروسه موږ شفافه نه بولو، له کرکټ بورډ څخه مو هیله دا ده چې د دغې پروسې په اړه له سره کتنه وکړي.»</p>
<p style="text-align: justify;">په ورته وخت کې، د افغانستان کرکټ بورډ مسوولين بيا وايي چې له ۱۹ کلنو کم عمره لوبډلې ته د لوبغاړو غوره کېدو پروسه په پوره شفافیت ترسره کېږي او وړتیاوې یې په نظر کې نیول شوې دي.</p>
<p style="text-align: justify;">د کرکټ بورډ د غوراوي کمېټې يوه غړي نظیم جار عبدالرحيمزي پژواک اژانس ته وويل چې دوی له لوبغاړو د ازادې سيالۍ له لارې ازموينه اخيستې، د هغو وړتیاوو ته پوره پام شوی او هيڅ ډول درغلي په کې نه ده شوې.</p>
<p style="text-align: justify;">هغه زياتوي: «دغه پروسه یو اوپن ټرايل و او هر چاته په کې مناسب وخت ورکول کېده چې خپله اندازه بالونه او بېټېنګ وکړي، د عمر تثبیت یې ډاکټر کاوه، اصلي موخه مو دا ده چې ۲۰۲۴ نړۍوال جام ته له دوی لوبډله انتخاب شي.»</p>
<p style="text-align: justify;">نوموړي په خپلو خبرو کې زياته کړه چې که هر څوک د يادې ازموينې په هکله نيوکه او يا شکايت لري، کولی شي د شکايتونو له ثبت شمېرې سره اړيکه ونيسي او رسېدنه به ورته کېږي.</p>
