اټلانټا (پژواک، د مرغومي لومړۍ نېټه ۱۴۰۱): د پاکستان پخواني لومړي وزیر عمران خان ویلي چې د پوځ پخواني مشر جنرال باجوه هغه ظلم وکړ، چې یو دښمن یې هم پاکستان سره نه کوي.
د پاکستان جیو تلویزیون خبر ورکړی چې نوموړي دا څرګندونې په لاهور کې د خپلویانو یوې اعتراضیه غونډې ته د ویډیو لینک په وسیله وینا کې کړې دي.
د یادونې وړ ده، چې اته میاشتې مخکې د پاکستان پارلمان عمران خان ته د نه باور رایه ورکړه او هغه یې له واکه لرې کړ، خو عمران خان ددې تور د پوځ د هغه مهال پر مشر جنرال باجوه اچوي.
عمران خان پخپله وینا کې وویل، جنرال یې د حکومت له منځه وړلو سره هغه ظلم وکړ، چې یو دښمن یې هم له پاکستان سره نه کوي.
هغه زیاته کړه، چې پاکستان کې اداري فساد خپل اوج ته رسیدلی و او هغه مهال جنرال د مفسدینو په ملاتړ دده حکومت ړنګ کړ.
نوموړي ادعا وکړه، چې د پاکستان ځینې پټ لاسونه دده ګونداو دی له منځه وړل غواړي.
عمران خان د پاکستان د ټولو ستونزو هواری په ازادو ټاکنو کې ګوري او یو ځل بیا یې ژر تر ژره په ټول هېواد کې د پارلماني ټاکنو غوښتنه وکړه.
خو د پاکستان رسنۍ او سیاسي شنونکي بیا وایي چې عمران خان د پاکستان د هغه مهال د پوځ مشر جنرال باجوه لخوا واک ته رسول شوی و او دده د بریا لپاره یې په ټاکنو کې درغلۍ کړې وې.
د یادونې وړ ده چې جنرال باجوه اوس تقاعد شوی دی.
Visits: 343
اړیکه ونیسئ
خبرپاڼه
د کیسې وړاندیز وکړئ
د پژواک اپلیکېشن