[restrict paid="true"]
لښکرګاه (پژواک، ٢٣ مرغومى ١٤٠١): د هلمند په موسیکلا ولسوالۍ کې د شپږ میلیون افغانیو په لګښت د څښاک اوبو رسونې يوه شبکه له جوړېدو وروسته ګټې اخيستنې ته وسپارل شوه.
د هلمند د اطلاعاتو او کلتور ریاست مرستیال مولوي محمدقاسم ریاض پژواک خبري اژانس ته وویل، د موسیکلا ولسوالۍ د خواجهداد په سيمه کې د اوبو يوه لويه شبکه ګټې اخيستنې ته وسپارل شوه.
هغه وايي چې پر ياده شبکه د يونیسف له لوري شپږ ميليون افغانۍ لګول شوې او چارې یې د شپږو مياشتو په موده کې بشپړې شوې.
هغه وويل چې دغه شبکه ٢٠٠ کورنيو ته د پاکو اوبو رسولو ظرفيت لري.
د خواجهداد سيمې اوسېدونکي نورالله پژواک ته وويل چې له دې مخکې دوى پاکو اوبو ته لاسرسی نه درلود خو اوس يې دا ستونزه هواره شوه.
د يادونې ده، د موسي کلا ترڅنګ دا مهال په سنګين، نوازد، نادعلي ولسوالیو کې هم د پاکو اوبو رسولو د ورته شبکو جوړولو چارې روانې دي.
[/restrict]
