د ننګرهار ګمرک ته پر ۱۵۰۰ جریب ځمکه نوې ودانۍ جوړېږي

جلال‌اباد (پژواک، ۲۷ مرغومی ۱۴۰۱): د ننګرهار ګمرک رييس وايي، د ګمرک اوسنۍ ودانۍ پر ١٠٠ جريب ځمکه کې ده چې د چارو پر مخ بیولو لپاره یې بسنه نه کوي، نو د نوې ودانۍ چارې يې پر ١٥٠٠ جريب ځمکه کې پيل کړې دي.

دغه څرګندونې د ننګرهار ګمرک رييس مولوي عبدالهادي ابرار د مرغومي په ۲۷مه،  ننګرهار کې د يوې خبرې غونډې پرمهال وکړې.

ابرار وايي، د اوسني ګمرک ودانۍ او ټوله احاطه په سل جريب ځمکه کې جوړه شوې چې د ګمرک د کارونو لپاره بسنه نه کوي.

هغه وويل، د دغه رياست په عوايدو کې دېرش سلنه زياتوالی راغلی او هيله‌من دی چې د کال تر پايه به د عوايدو کچه نوره هم لوړه شي.

نوموړی زياتوي: «موږ توانېدلي يو چې يوازې په تېرو درېيو مياشتو کې ۷۸۵ ميليون افغانۍ عواید ترلاسه کړو، په داسې حال کې چې دغو مياشتو کې موږ له صادراتو ټيکس نه اخېسته، ځکه زياتره يې تازه مېوه او سبزيجات وو.»

ابرار وايي، هره ورځ له ۱۰۰۰ تر ۱۲۰۰ پورې بار لارۍ په دغه ګمرک کې محصول کېږي چې د سوداګرۍ چارې يې په قانوني ډول پر مخ روانې دي.

دی زياتوي، د قاچاق او فساد مخنيوي لپاره يې پر بېلابېلو لارو چارو کار کړی چې تر ډېره د فساد مخه نيول شوې ده.

هغه وايي: «موږ خو اوس ټولو خلکو ته اطمینان ورکوو چې فساد ختم دی او دوی راتللی شي، خپله یې هم ليدلی شي، په تېر کې فساد داسې شوی و چې قيمتي اجناس يې زياتره د تشناب کاغذ، ګچو او سيمنټو په نوم محصول کړي دي، اوس زموږ ټول ارشيف له همدغو ډک دی.»

د ننګرهار ګمرک رييس مولوي ابرار دا هم وويل چې د چارو پر مخ بیولو لپاره یې د ګمرک اوسنۍ ودانۍ او د سوداګريزو موټرو تمځای بسنه نه کوي، ځکه يې له ښاره بهر په کابل کمپ سيمه کې پر ۱۵۰۰ جريب ځمکه د ګمرک لپاره د نوې ودانۍ او احاطې جوړولو کارونه پيل کړي دي.

نوموړی وايي، پر زر جريب ځمکه به د ګمرک تاسيسات ورغول شي او ۵۰۰ جريب ځمکه به د موټرو تمځای ته ځانګړې شي چې ورسره به د ګمرک ټولې ستونزې حل شي.

د ننګرهار ګمرک رييس وايي، تورخم ګمرک هم د موټرو تمځای او په نورو برخو کې ستونزه لري چې د لعلپورې ولسوالۍ په مربوطاتو کې به ورته پر شپږ سوه جريب ځمکه نوي تاسيسات او د سوداګرۍ د پرمختګ لپاره ځايونه جوړ شي.

د ګمرک رييس دا هم وويل چې د سردار محمد داوود خان د وخت د پلان له مخې، د تورخم ښارګوټی به ډکې سیمې ته انتقال شي او په تورخم کې به هم د سوداګرۍ د پرمختګ لپاره تاسيسات جوړ شي.

د يادونې ده، د ننګرهار د اطلاعاتو او کولتور رياست اطلاعاتو ته د لاسرسي په موخه هره سه‌شنبه، د دغه ولايت د رييسانو د فعاليتونو خبري کنفرانسونو لړۍ پيل کړې چې دغه کنفرانس يې هم يوه برخه وه.