پل علم (پژواک، ۲۹ سلواغه ۱۴۰۱): د لوګر د ملي المپيک ادارې چارواکي وایي، د دغه ولایت په مرکز پل علم کې د هېواد په کچه د اتو ولایتونو لوګر، پکتیا، خوست، میدان وردګ، هرات، غور او فراه ترمنځ د کبډي څلور ورځنۍ سیالۍ وشوې.
د دغه ولایت د المپیک ادارې امر مزمل نعیمزي پژواک خبري اژانس ته وویل، دغه سیالۍ د افغانستان ملي المپيک ادارې له لوري د هېواد په کچه د اتو ولایتونو د ۱۲ لوبډلو ترمنځ پيل شوې وې چې څلور ورځې یې دوام وکړ.
هغه زیاته کړه، د یادې سیالۍ پایلوبې ته خوست او فراه ولایتونو لاره پيدا کړه چې خوست لومړی، فراه دویم او لوګر درېیم مقام خپل کړ.
نوموړی وایي: «د کبډي سیالیو د جوړولو موخه د هېواد په کچه د دغې نسبتا هېرې شوې لوبې بیا را ژوندۍ کول او همدارنګه د هېواد په کچه د کبډي لوبغاړو ترمنځ همغږي جوړول دي.»
د کبډي سیالۍ یوه لوبغاړي احمد بشارت پژواک خبري اژانس ته وویل، کبډي لوبه د هېواد په کچه له پامه غورځول شوې ده، خو دا ډول سیالۍ کولای شي چې دغه لوبه بیا را ژوندۍ او د لوبغاړو ترمنځ ښې اړیکې رامنځته کړي.
هغه وایي: «زه نن ډېر خوښ یم چې لوګر ولایت کې د کبډي په سیالۍ کې ولوبېدم، خو دغه لوبه له پامه غورځول شوې ده او له المپیک ادارې څخه غواړم چې د دغې لوبې پرمختګ ته لا ډېر کار وکړي.»
همدارنګه د کبډي لوبې یوه بل لوبغاړي محمداشرف پژواک خبري اژانس ته وویل، د ملي المپیک ادارې ته په کار ده چې د هېواد په کچه د کبډي لوبې لوبغاړو ظرفیت لوړونې ته پام وکړي او دوی ته له هېواده بهر د روزنې زمینه برابره کړي.
نوموړی وایي: «په پل علم کې د اتو ولایتونو ترمنځ د کبډي څلور ورځنۍ سیالۍ په بریالیتوب سره پای ته ورسېدې. دا ډول لوبې مهمې دي، د لوبغاړو ترمنځ اړیکې جوړېږي، تجربې شریکېږي، خو المپیک ادارې ته په کار ده چې د لوبغاړو ظرفیت لوړولو ته لومړیتوب ورکړي.»
باید وویل شي چې د اسلامي امارت له واکمنېدو وروسته دا لومړۍ ځل دی چې د هېواد په کچه د کبډي سیالۍ د لوګر ولایت په مرکز پل علم کې ترسره شوې او سلګونه مینهوال یې لیدلو ته راغلي وو.
