<p style="text-align: justify;">پارون (پژواک، ۲۳ کب ۱۴۰۱): د افغانستان لپاره د سویډن کمېټې مسوولین وايي، د ملګرو ملتونو پرمختیايي پروګرام/ UNDP په مالي لګښت په نورستان ولایت کې درې روغتیايي مرکزونه او پنځلس کورنۍ روغتیايي ځالې جوړوي.</p>
<p style="text-align: justify;">د یادې کمېټې استازو دا څرګندونې نن د کب په ۲۳مه د نورستان له والي حافظ محمداغا حکیم سره په لیدنه کې وکړې.</p>
<p style="text-align: justify;">د افغانستان لپاره د سویډن کمېټې ولایتي مسوول ډاکټر عطاءالله ساپي په دې اړه پژواک خبري اژانس ته وویل، دغه کمېټه په راتلونکي ۱۴۰۲ لمریز کال کې د نورستان په وانټوایګل، دواب او برګمټال ولسوالیو کې درې روغتیايي مرکزونه او ۱۵ کورنۍ روغتیايي ځالې جوړوي.</p>
<p style="text-align: justify;">هغه زیاته کړه، د روغتیايي مرکزونو پر جوړولو ټولټال ۲۰ میلیون افغانۍ او د پنځلسو کورنیو روغتیايي ځالو پر جوړولو څه باندې ۱۰۰ زره امریکايي ډالر لګښت راځي چې د ملګرو ملتونو پرمختیايي پروګرام له لوري ورکول کېږي.</p>
<p style="text-align: justify;">نوموړی وايي، د درېیو فرعي روغتیايي مرکزونو ودانۍ د اساسي روغتیايي مرکزونو په بڼه جوړوي څو په راتلونکي کې د ارتقا په صورت کې د ودانیو کمښت و نه لري.</p>
<p style="text-align: justify;">دغهراز ساپي د کورنیو روغتیايي ځالو په اړه هم معلومات ورکړل چې په هره روغتیايي ځاله کې به یوه قابله او د خوارځواکۍ د مخنیوي یوه مشاوره کار کوي څو په اړوندو برخو کې خلکو ته خدمات وړاندې کړي.</p>
<p style="text-align: justify;">د نورستان ولایت د عامې روغتیا رییس مولوي نقیبالله نوري د سویډن کمېټې او د ملګرو ملتونو د پراختیايي پروګرام دغه اقدام ستايي.</p>
<p style="text-align: justify;">د هغه په خبره، له دغه ګام سره به په یاد ولایت کې روغتیايي خدمات پراخ شي.</p>
<p style="text-align: justify;">هغه وویل، اوسمهال په نورستان کې ۳۷ روغتیايي مرکزونه شته چې درې د ولسوالیو په کچه روغتیايي مرکزونه، څلور بنسټیز روغتیايي مرکزونه او ۳۰ نور فرعي روغتیايي مرکزونه پکې شامل دي.</p>
<p style="text-align: justify;">خو نوري یادونه وکړه، په یاد ولایت کې لا هم داسې سیمې شته چې اوسېدونکي یې روغتیايي خدماتو ته لاسرسی نه لري او باید روغتیايي مرکزونه ورته جوړ شي.</p>
<p style="text-align: justify;">د افغانستان لپاره د سویډن کمېټه په نورستان کې له عامې روغتیا ریاست سره همکاره موسسه ده چې له نړۍوالو بنسټونو بودجه اخلي او له دې لارې د دغه ولایت روغتیايي مرکزونو ته دارو درمل برابروي او د روغتیايي پرسونل معاش ورکوي.</p>
<p style="text-align: justify;">نورستان د هېواد له هغو ولایتونو دی چې د پېچلي جغرافیايي جوړښت له امله یې د ډېرو سیمو اوسېدونکي روغتیايي مرکزونو ته تر رسېدو ساعتونه پلی مزل کوي.</p>
