<p style="text-align: justify;">غزني ښار (پژواک، ۱۲ وری ۱۴۰۲): غزني کې امنیتي مسوولین وايي، غزني ښار کې لېوني سپي ډېر شوي چې د دغه ولایت د عامې روغتیا له ریاست سره په ګډه یې له منځه وړو کمپاین پیل کړی دی.</p>
<p style="text-align: justify;">د دغه ولایت امنیې قوماندانۍ ویاند ابوخالد سرحدي پژواک خبري اژنس ته وویل، د غزني مرکز په ځینو سیمو کې لېوني سپي ډېر شوي چې یو شمېر کسان یې داړلي دي.</p>
<p style="text-align: justify;">دی زیاتوي، د غزني ښار د دویمې امنیتي حوزې اړوند د خشک، قلعه تحویلدار او خواجه بقال سیمو کې له تېرو درېیو ورځو را په دېخوا لېوني سپیانو ۱۶ کسان داړلي دي.</p>
<p style="text-align: justify;">د هغه په خبره، داړل شوو کسانو روغتیايي مرکزونو ته مراجعه کړې او د ډاکټرونو له لوري واکسین شوي او درملنه یې شوې ده.</p>
<p style="text-align: justify;">نوموړي وویل، د عامي روغتیا ریاست په غوښتنه امنیتي ځواکونو د لېوني سپیانو د له منځه وړو په موخه جدي اقدام کړی او کمپاین یې پیل<img class="alignleft wp-image-527378 " src="https://pajhwok.com/wp-content/uploads/2023/04/سگ-غزنی-1024x603.webp" alt="" width="380" height="224" /> کړی چې همدا نن ورځ یې په لسګونه لېوني سپي له منځه وړي دي.</p>
<p style="text-align: justify;">دی وايي، دا لړۍ به تر هغه روانه وي چې لېوني سپي ورک شي او خلک یې له زیانه خوندي شي.</p>
<p style="text-align: justify;">د غزني ښاریان هم د لېوني سپیانو ډېرېدو خبره کوي او وايي، په دې وروستیو کې لېوني سپي ډېر شوي وو چې د ماشومانو ترڅنګ یې لویان هم داړل.</p>
<p style="text-align: justify;">د منصور په نوم د غزني ښار یوه اوسېدونکي پژواک ته وویل، د امنیې قوماندانۍ له دغه اقدامه خوښ دی چې لېوني سپي له منځه وړي.</p>
<p style="text-align: justify;">هغه زیاته کړه: «خبرېږو چې لېوني سپي ډېر شوي، هره ورځ کسان داړي، نو موږ هم په ډاډه زړه نه شو ګرځېدای، که کار ته ځو هم په وېره کې یو او که د شپې له خوا مسجد ته ځو هم دا وېره راسره وي چې اوس به مو لېوني سپي ونه داړي.»</p>
<p style="text-align: justify;">دی وايي، ستونزه دا ده، کله چې په یوه سیمه کې یو لېونی سپی پیدا کېږي نو په ورڅېرمه سیمو کې نور سپي هم لېوني کېږي او شمېر يې ډېرېږي.</p>
<p style="text-align: justify;">خو دی دا غوښتنه هم کوي چې له منځه وړل شوي سپي دې له ښاره لرې سیمو ته یووړل شي او تر خاورو دې لاندې شي څو ناروغۍ ورڅخه خپرې نه شي.</p>
