کابل (پژواک، ۸ غويی ۱۴۰۲): اسلامي امارت د غويي اوومه توره او د غويي اتمه د هېواد د ازادۍ ورځ بولي او زياتوي، دا چې افغانستان له «امریکایي اشغاله» آزاد شوی، هڅه کوي څو د دې ولس د لسګونه کلونو قربانیو او مبارزو ثمره ضایع نشي.
د افغانستان اسلامي امارت ویاند ذبيحالله مجاهد وايي، سرپرست حکومت د غويي اوومې کودتا د یوي تورې ورځې په توګه غندي، د غويي اتمه نمانځي او د هېواد د ازادۍ ورځ يې بولي.
هغه زياتوي: « د ۱۳۷۱ د غويي ۸ مه نېټه د افغان ملت د بري، ازادي او نجات ورځ ده چې د افغان مجاهد ملت قربانیو نتیجه ورکړه او زموږ ولس او هېواد د کمونېزم له ښامار څخه نجات حاصل کړ.»
مجاهد وايي: «دا چې زموږ هېواد تازه له امریکایي اشغاله آزاد شوی، اسلامي نظام قایم شوی؛ نو اسلامي امارت به هم نهایت تلاش کوي، څو د دې ملت د لسګونو کلونو قربانیو او مبارزو ثمره ضایع نشي او په هېواد کې د شهیدانو ارمان اسلامي نظام په بشپړه توګه نافذ شي.»
سرچینه زياتوي، د افغانستان سرپرست حکومت به هڅه وکړي چې د افغان ولس د ټولو جهادونو ارمانونه لکه څرنګه چې لازمه ده، وپالي او د اسلامي نظام تر سیوري لاندې د افغانستان د ابادۍ او سوکالۍ لپاره ښه زمینه برابره کړي.
د ده په وينا، ۴۵ کاله مخکې د ۱۳۵۷ کال د غويي په اوومه څو پرديپالو کمونیستانو په افغانستان کې کودتا وکړه چې په هېواد کې د ډېرو ناورینونو او بد مرغیو لامل شوه.
هغه زياتوي: «دغو بیګانهپرستو څېرو د افغان مسلمان او مجاهد ملت د مقدساتو او اسلامي ارزښتونو په وړاندې په جنایتونو لاس پورې کړ، خو للهالحمد زموږ مسلمان او مجاهد ملت د کمونیستي فکر او د هغوی د اعمالو په وړاندې قیام وکړ او دا جهادي مبارزه چې له بېسارې قربانیو سره مله وه، ۱۴ کاله روانه وه.»
د هغه په وينا، تر سختې او درنې مبارزې وروسته د افغانستان مسلمان او مجاهد ملت - چې درانه تلفات وګالل، نږدې یونیم میلیون افغانان شهیدان او میلیونونه نور له بېلابېلو ستونزو سره مخ شول - د وخت شوروي اشغالګرو کمونیستي اداره يې را نسکوره او هېواد یې په بشپړه توګه ازاد کړ.
غړيYou need to subscribe to view the full article. Please login or register a new account.
