مجاهد: هېوادونه باید د خپلو هغو اتباعو مخه ونیسي چې افغانستان ته د ورانکارو کړنو لپاره د راتګ هڅه کوي

کابل (پژواک، ۱۰ غویی ۱۴۰۲): اسلامي امارت د روسیې دفاع وزیر د څرګندونو په غبرګون کې وایي، چاته اجازه نه ورکوي چې د افغانستان خاوره د نورو هېوادونو پر ضد وکارول شي او له نورو په تېره د سیمې له هېوادونو تمه لري، د خپلو هغو وګړو مخه ونیسي چې افغانستان ته د ورانکارو کړنو لپاره د داخلېدو هڅه کوي.

د اسلامي امارت ویاند ذبیح‌الله مجاهد نن په خپله ټوېټرپاڼه کې لیکلي، اسلامي امارت د روسیې د دفاع وزیر سرګي شایګون هغه څرګندونې ردوي چې ګواګې له افغانستانه وسله‌والې ډلې د منځنۍ اسیا هېوادونو امنیت ته لوی ګواښ پېښوي.

د روسیې دفاع وزیر دغه څرګندونې د روانې غویي میاشتې په اتمه د شانګهای سازمان غړو هېوادونو د دفاع وزیرانو په غونډه کې – چې د هند په کوربه‌توب جوړه شوې وه ـ کړې دي.

هغه لیکلي، اسلامي امارت نه یوازې دا چې له کلونو جګړې وروسته په افغانستان کې امنیت او ثبات ټینګ کړی، بلکې په سیمه کې هم امنیت او ثبات له خپل اقتصاد محوره بهرنی سیاست سره مرستندوي بولي او په هیڅ صورت نه غواړي امنیتی ګواښونه موجود وي.

مجاهد زیاته کړې: «د روسیې هېواد مسئوولین باید متوجه وي چې په تېرو څه کم دوو کلونو کې نه یوازې دا چې له افغانستان څخه د سیمې او نړۍ د کوم هېواد امنیت له ګواښ سره نه دی مخ شوی، بلکې د افغانستان اسلامي امارت امنیتي ځواکونه توانېدلي چې په بشپړ قاطعیت سره په افغانستان کې د داعش فتنه‌ګرې ډلې پاتې‌شوني تصفیه کړي.»

هغه دا هم ویلي چې د افغانستان سرپرست حکومت د یوه مسوول حکومت په توګه چاته اجازه نه ورکوي چې د افغانستان خاوره د نورو هېوادونو پر ضد وکارول شي او له نورو هېوادونو څخه، په ځانګړې توګه د سیمې له هېوادونو هم تمه لري چې د خپلو هغو اتباعو مخه ونیسي چې افغانستان ته د ورانکارو پېښو ترسره کولو په موخه د داخلېدو هڅه کوي.

مجاهد لیکلي، په افغانستان کې د ناامنۍ څو وروستۍ پېښې د سیمې د ځینو هېوادونو د اتباعو له لوري ترسره شوې دي، دا ستونزه ایجابوي چې دغه حکومتونه خپل مسوولیت ادا کړي.