<p style="text-align: justify;">پلخمري (پژواک، ١١ غبرګولی ۱۴۰۲): د سالنګ لویې لارې يو شمېر موټرچلوونکي وايي چې په دې وروستيو کې دغه لار ډېره خرابه شوې او بيارغونې ته یې جدي اړتيا ده.</p>
<p style="text-align: justify;">د سالنګ لار پلازمېنه کابل د شمال له نهو ولايتونو سره نښلوي او هره ورځ پر دې لار زرګونه موټر تګ راتګ کوي.</p>
<img class="aligncenter wp-image-540886 size-full" src="https://pajhwok.com/wp-content/uploads/2023/06/سرک-شاهراه-سالنگ-3.jpg" alt="" width="448" height="271" />
<p style="text-align: justify;">د یادې لارې يوه موټرچلوونکي مشتاقاحمد پژواک خبري اژانس ته وویل چې د پخوا په پرتله سږ کال د سالنګ لويه لار ډېره خرابه شوې او بيارغونې ته یې جدي اړتيا ده.</p>
<p style="text-align: justify;">هغه وايي: «پخوا به چې موږ له کابله حرکت وکړ، نو تر پلخمري پورې به څلور يا څلورنيمو ساعتونو کې رسېدلو، خو اوس چې د سالنګ لار خرابه ده نو زموږ دغه مزل ٧ ساعتونو ته رسېږي.»</p>
<p style="text-align: justify;">دغه راز د مسافر وړونکي یوه موټر چلوونکي نقيب الله پژواک ته وويل، په کومه ورځ چې باروړونکو موټر روان وي، نو د سړک خرابوالي له امله ګڼه ګوڼه بېخي ډېره شي، بيا د دوى ټوله ورځ په سالنګ کې تېريږي.</p>
<p style="text-align: justify;">دغه راز د باروړونکي یوه موټر چلوونکي فريد وويل چې په دې وروستيو کې په سالنګونو کې سړکونه ډېر خراب شوي، موټر پرې په اسانه تګ راتګ نه شي کولاى.</p>
<p style="text-align: justify;">هغه وايي: «ورځ تر بلې سالنګ لار کې کندې ډېريږي، سفر په کې بېخي مشکل شوى، که جوړ نه شي دا سړک له منځه ځي.»</p>
<p style="text-align: justify;">يو شمېر نورو موټرچلوونکو هم ورته څرګندونې وکړې او له حکومته يې په اساسي ډول د بیاجوړولو غوښتنه وکړه.</p>
<img class="aligncenter wp-image-540885 size-full" src="https://pajhwok.com/wp-content/uploads/2023/06/سرک-شاهراه-سالنگ-2.jpg" alt="" width="448" height="252" />
<p style="text-align: justify;">خو د سالنګ لویې لارې د څار او ساتنې ادارې مسوول عبدالحلیم اغا پژواک ته وویل چې څلور ځايه د سالنګ لويې لارې هوارولو چارې روانې دي.</p>
<p style="text-align: justify;">هغه وايي: «موږ هڅه کې يو چې د سالنګ لپاره يو بديله لار هم پيدا کړو، څو هم کار روان وي او هم د موټرو پر مخ لار بنده نه شي.»</p>
<p style="text-align: justify;">هغه وويل، د حکومت له لوري تر اوسه کلنۍ ملي بودجه نه ده اعلان شوې، هر وخت چې یې بودجه ترلاسه کړه نو د سړک جوړولو چارې به ګړندۍ کړي.</p>
<p style="text-align: justify;">د يادونې ده، د سالنګ لويه لار د لومړي ځل لپاره په ١٣٤٣ هـ ش کال کې د وخت شوروي اتحاد له خوا جوړه شوې ده.</p>
