<p style="text-align: justify;">جلالاباد (پژواک، ۲۵ غبرګولی ۱۴۰۲): د ننګرهار ولايت په کامې ولسوالۍ کې د ٢٢٥ زره امريکايي ډالرو په لګښت د يوه ښوونځي لپاره نوې ودانۍ جوړه شوه.</p>
<p style="text-align: justify;">د ښوونځي دغه ودانۍ اداري او تدريسي خونې، کمپيوټر لېب، د ساينسي تجربو لابراتوار او نور اړين ځايونه لري چې د شپږو مياشتو په موده کې جوړه شوې ده.</p>
<p style="text-align: justify;">د ننګرهار ولايت د پوهنې رياست وياند فرهاداحمد ستانکزي نن (د غبرګولي ۲۵مه) پژواک اژانس ته وويل، د کامې ولسوالۍ اړوند د زاخېلو لېسې لپاره نوې جوړه شوې يو پوړيزه ودانۍ تېره ورځ ناوخته ګټې اخېستنې ته وسپارل شوه.</p>
<p style="text-align: justify;">هغه زياته کړه، یاده ودانۍ د کډوالۍ نړۍوال سازمان/IOM د ۲۲۵ زره امریکايي ډالرو په لګښت د شپږو میاشتو په موده کې جوړه شوې ده.</p>
<p style="text-align: justify;">ستانکزی وايي: «د زاخېلو لېسې نوې ودانۍ يو کمپېوټر لېب، يو ساينس لېب، دوه اداري خونې، شپږ تدريسي خونې، پنځه غرفې، عصري تشنابونه، يوه د پاکو اوبو څاه او ۲۸۵ متره احاطوي دېوال لري او د دې ترڅنګ ټولې خونې په اړونده اداري او تدريسي اجناسو هم مجهزې شوې دي.»</p>
<p style="text-align: justify;">دا په داسې حال کې ده چې په ننګرهار کې دا مهال ګڼ شمېر نور ښوونځي هم ودانۍ نه لري، خو د دغه ولايت د پوهنې رياست مسوولين وايي چې هڅې يې پيل کړې دي څو ټولو ښوونځيو ته ودانۍ جوړې کړي.</p>
