له کابله تللي درې ځوانان د کونړ سیند کې ډوب او مړه شوي

<p style="text-align: justify;">[restrict paid="true"]</p>

<p style="text-align: justify;">اسعداباد (پژواک، ۹ چنګاښ ۱۴۰۲): د کونړ ځايي چارواکي وایي، د دغه ولایت په ماڼوګي ولسوالۍ کې له کابله تللي درې کسان په سیند کې د ډوبېدو له امله مړه شوي دي.</p>

<p style="text-align: justify;">د ماڼوګي ولسوال احمدګلاب د چنګاښ په ۹مه، پژواک اژانس ته وویل چې دا پېښه د جمعې په ورځ تر غرمې وروسته د دغې ولسوالۍ په ټنټیل سیمه کې رامنځته شوې ده.</p>

<p style="text-align: justify;">هغه زیاته کړه، پنځه کسان په کونړ سیند کې لامبل چې ټول اوبو کې ډوب شوي وو، خو دوه کسان یې د خلکو له خوا وژغول شول او د درېیو مړي موندل شوي دي.</p>

<p style="text-align: justify;">نوموړی وایي، یاد درې کسان د کابل د ګل‌درې ولسوالۍ اوسېدونکي وو چې له خپلو نورو ملګرو سره د چکر لپاره کونړ ته راغلي وو.</p>

<p style="text-align: justify;">هغه وایي، له دغو سیلانیانو څخه یو کس سیند کې د لامبلو پر مهال اوبو وړی و چې دوه نورو ملګرو یې د مرستې په موخه سیند ته وردانګلي وو، خو درې واړه اوبو اخیستي و چې بیا د ځایي اوسېدونکو له لوري یې مړي موندل شوي دي.</p>

<p style="text-align: justify;">ولسوال وویل، د یادو کسانو مړي د اسعداباد ولایتي روغتون ته لېږدولي او په وینا یې چې له هغه ځایه به یې کابل ته انتقال کړي او خپلو کورنیو ته یې وسپاري.</p>

<p style="text-align: justify;">[/restrict]</p>