[restrict paid="true"]
<p style="text-align: justify;">اټلانټا (پژواک، ۱۴ چنګاښ ۱۴۰۲): د امریکا متحده ایالتونو چارواکي وايي، راتلونکی کال به د دغه هېواد تابعيت اخیستو لپاره د ازموینې بڼه بدله شي، خو د کډوالۍ او د پناهغوښتنې چارو مدافعان بیا اندېښمن دي چې دغه بدلون به د هغو کسانو لپاره ستونزې جوړې کړي چې له انګلیسي ژبې سره لږه بلدتیا لري.</p>
<p style="text-align: justify;">د امریکا غږ د راپور له مخې، دغه ازموینه د متحده ایالتونو تابعیت اخیستو په موخه یو له وروستیو ګامونو دی چې اداري بهیر یې میاشتې میاشتې وخت نیسي او ځیني هغه کسان چې په امریکا کې د دایمي استوګنې (شین کارت) لري، باید د دغه هېواد تابعیت اخیستو لپاره کلونه انتظار وباسي.</p>
<p style="text-align: justify;">د تابعیت ازموینې د وروستۍ نسخې بیا کتنه په ۲۰۰۸ کې شوې او چارواکي وايي، دا ازموینه باید په هرو ۱۵ کلونو کې نوې شي؛ د چارواکو په وینا، د تابعیت ازموینې نوې نسخه به په راتلونکي کال کې نهايي شي.</p>
<p style="text-align: justify;">د امریکا پخواني ولسمشر ډونالډ ټرمپ په ۲۰۲۰ کال کې دې ازموینې ته بدلون ورکړ او هغه یې اوږده او ستونزمنه کړه خو د امریکا اوسني ولسمشر جوبایډن د خپلې ولسمشرۍ په لومړیو میاشتو کې د یو اجرائیوي فرمان په لاسلیکولو سره د پخواني ولسمشر ټرمپ له خوا رامنځته شوي خنډونه لرې کړل او د تابعیت ازموینه یې بېرته د ۲۰۰۸ نسخې ته ور وګرځوله.</p>
<p style="text-align: justify;">د امریکا متحدو ایالتونو د تابعیت او کډوالۍ خدمتونو ادارې (یواېسسيایاېس) وړاندیز کړی چې د تابعیت ازموینې ته د انګلیسي ژبې مهارتونو ارزولو لپاره د «خبرې کولو یا محاورې» نوې برخه اضافه کړای شي، په کوم کې چې ازموینه اخیستونکي ته به د ورځني چارو لکه د اوبه او هوا یا د خوړو یو عکس وښودل شي او نوموړی باید د هغه په اړه خبرې وکړي.</p>
<p style="text-align: justify;">د تابعیت په اوسنۍ ازموینه کې د امریکا متحده ایالتونو د تابعیت او کډوالۍ خدمتونو ادارې چارواکي د مرکې په ترڅ کې د انګلیسي ژبې مهارتونه د شخصي پوښتنو له لارې ارزوي کوم چې غوښتونکي له وړاندې د تابعیت منلو په اسنادو کې ځواب کړي دي.</p>
<p style="text-align: justify;">په جورجیا ایالت کې د افغانانو د متحدې ټولنې مرکزي غړي اسدالله صافی وایي، دا به د هغو کډوالو لپاره ډېرې ستونزې جوړې کړي چې د انګلیسی ژبه کې ستونزې لري.</p>
<p style="text-align: justify;">هغه زیاته کړ: «په وروستیو کلونو کې د هر عمر لرونکي افغانان امریکا ته راغلي، د ډېر عمر لرونکي نارینه او ښځینه وو ته به دا ډېره ګرانه وي چې انګلیسي زده کړي او سخته ازموینه ورکړي.»</p>
<p style="text-align: justify;">بل وړاندیز شوی بدلون به د امریکا متحدو ایالتونو د تاریخ او حکومت په اړه د مدني برخې پوښتنو پر ځای څو انتخابي پوښتنو ته د لنډو شفاهي ځوابونو ورکول دي.</p>
<p style="text-align: justify;">د امریکا متحدو ایالتونو د تابعیت او کډوالۍ خدمتونو ادارې د ډسمبر په میاشت کې په یوې اعلامیه کې وویل چې د ازموینې په برخه کې وړاندیز شوي بدلونونه یو له غوره لارو څخه دی چې د تابعیت د ازموینې په معیاري کولو کې مرسته کوي.</p>
<p style="text-align: justify;">د امریکا د فدرال قانون له مخې، ډېری کسان چې د تابعیت غوښتونکي دي باید په انګلیسي ژبه پوه شي او د عامو کلمو د ویلو ، لوستلو او لیکلو د وړتیا ترڅنګ، د متحدو ایالتونو د تاریخ او حکومت په اړه یوه اندازه پوهه او معلومات ولري.</p>
<p style="text-align: justify;">یادې ادارې ویلي چې وړاندیز شوي بدلونونه په ۲۰۲۳ م کال کې پیلیږي او بیا به د ژبې او مدني کارپوهانو یوه ډله یې د پایلې ارزونه وکړي. دغه کاري ډله به د بدلونونو د ښه پلي کولو په موخه د امریکا د متحدو ایالتونو د تابعیت او کډوالۍ د خدمتونو ادارې ته خپل وړاندیزنه هم وړاندي کړي.</p>
<p style="text-align: justify;">د کالیفورنیا د سان فرانسیسکو په پوهنتون کې د سیاسي علومو پروفیسوره سارا ګوډمن وايي، د امریکا متحده ایالتونه اوسمهال د جرمني، کاناډا او بریتانیې په ګډون د نورو لویدیځو هیوادونو په پرتله د تابعیت د ترلاسه کولو تر ټولو اسانه ازموینه لري.</p>
<p style="text-align: justify;">د امریکا د متحدو ایالتونو د تابعیت او کډوالۍ د خدمتونو ادارې په وینا، په ۲۰۲۲ مالي کال کې له یو میلیون څخه زیاتو کسانو د دغه هېواد تابعیت ترلاسه کړل چې له ۱۹۰۷ راهیسې ترټولو لوی شمېر ګڼل کېږي.</p>
[/restrict]
