اټلانټا (پژواک، ۱۵ چنګاښ ۱۴۰۲): د بریتانیا سفارت شارژدافیر وایي، په ۲۰۲۱ کال کې د جمهوریت له سقوط وروسته یې هېواد له افغانستان سره ۶۵۰ میلیون ډالر مرسته کړې ده.
د افغانستان لپاره د بریتانیا سفارت له خوا د چنګاښ په ۱۵مه خپره شوې یوه خبرپاڼه کې راغلي، د سفارت سرپرست (شارژدافیر) روبیرټ چاټرټون ډیسکون او د هغه مرستیاله نصیره اشرف په دې وروستیو کې افغانستان ته سفر کړی و.
د یادونې ده، د افغانستان لپاره د بریتانیا سفارت د قطر پلازمېنه دوحه کې فعالیت کوي.
سرچینې زیاته کړې، د دغه سفر پر مهال نوموړي د ریاستالوزراء له سرپرست مولوي عبدالکبیر، د بهرنیو چارو وزارت له سرپرست مولوي امیرخان متقي، د عامې روغتیا وزارت له سرپرست ډاکټر قلندر عباد، د لوړو زدهکړو وزارت له سرپرست ندامحمد ندیم او د اطلاعات او کلتور وزارت له سرپرست مولوي خیرالله خیرخواه سره ولیدل.
د بریتانیا شارژدافیر ویلي: «ډېر د خوښۍ ځای دی چې یو ځل بیا کابل ته راغلم؛ زما سفر د دې ښکارندویي کوي چې بریتانیا له ټولو افغانانو او په راتلونکي کې له افغانستان سره همکاریو ته ژمن دی، په داسې حال کې کابل ته راغلم چې اوسمهال دلته ګڼې ننګونې دي.»
هغه زیاته کړې، افغانستان اوسمهال د نړۍ په کچه له ستر بشري بحران سره مخ دی، د نږدې نیمې پېړۍ بحرانونو، وچکالۍ او د اقلیم بدلون د افغانانو ستونزې نورې هم زیاتې کړې دي.
نوموړي ویلي، ۲۸ میلیون افغانان بشري مرستو ته اړتیا لري او اقتصادي وضعیت خراب ښکاري، له همدې امله بریتانیا د ۲۰۲۱ کال له اګسټ راهیسې له افغانستان سره د ۶۵۰ میلیون ډالرو مرسته کړې ده.
روبیرټ ډیسکون وایي، په کابل کې یې د سرپرست حکومت له مشرانو سره پر بېلابېلو موضوعاتو پراخې خبرې کړې دي، هغوی په ډاګه کړه چې د نشهیي توکو پر ضد یې پراخ پرمختګونه کړي، امنیت ښه شوی او د فساد کچه هم ټیټه شوې ده.
د بریتانیا شارژدافیر ویلي: «هغوی ته مې د هغو فرمانونو په اړه خپله اندېښنه په ډاګه کړه چې د ښځو او نجونو حقوق کمزوري کوي.»
د هغه په وینا، دوی له کابل سره موافقه وکړه چې د روغتیا او پوهنې په برخو کې د رغنده اقداماتو ترسره کولو په موخه به په ګډه کار کوي.
نوموړي زیاته کړې، له افغانستان سره به د بریتانیا مرستې دوام لري.
بلخوا د ریاست الوزراء سیاسي مرستیال له دفتره په خپره شوې خبرپاڼه کې راغلي، کفیل او سیاسي مرستیال مولوي عبدالکبیر نن د افغانستان لپاره د برېتانیا له شارژدافیر رابرټ چاټرټون ډیکسن او مل پلاوي سره ولیدل.
سرچینې زیاته کړې، په دې کتنه کې د برېتانیا شارژدافیر د افغانستان او برېتانیا ترمنځ د اړیکو رغولو پر اړتیا او دې برخې ته د برېتانیا پر لېوالتیا خبرې وکړې.
هغه وویل، دوی د افغانانو د هوساینې په موخه له اسلامي امارت سره ګډ کار کوي.
رابرټ چاټرټون ډيکسن د اسلامي امارت او برېتانیا د علاقې وړ موضوعاتو په اړه د بحثونو پر دوام ټینګار وکړ او ویې ویل، برېتانیا یو بسیا او سوکاله افغانستان د نړۍ په ګټه بولي، له همدې امله له اسلامي امارت سره د مثبت تعامل غوښتونکي دي.
نوموړي عبدالکبیر ته ډاډ ورکړ چې د شته ستونزو د حل لپاره به ورسره ګډې هڅې وکړي.
ورته مهال، مولوي عبدالکبیر د افغانستان او برېتانیا اړیکو ته په اشاره وویل، اسلامي امارت د برېتانیا په ګډون له ټولو هېوادونو سره د متقابل احترام پر بنسټ مثبتې او رغنده اړیکې غواړي.
عبدالکبیر زیاته کړه، د اسلامي امارت د هڅو په پایله کې د اداري فساد او نورو ناخوالو مخه نیول شوې او په ټولو برخو کې شفافیت رامنځته شوی دی.
غړي
You need to subscribe to view the full article. Please login or register a new account.
