قلعهنو (پژواک، ۲۵ چنګاښ ۱۴۰۲): د بادغیس عامې روغتیا ریاست وايي، د دغه ولایت په مرکز قلعهنو ښار کې د انتاني ناروغیو درملنې ۲۰ بستریز روغتون جوړ او پرانیستل شو.
د بادغیس عامې روغتیا رییس ډاکټر عجبخان حمیدي پژواک خبري اژانس ته وویل، یاد روغتون د روغتیا نړیوال سازمان (ډبلیواچاو) په مالي مرسته جوړ شوی دی.
د نوموړي په خبره، په دغه روغتون کې- چې د دوو متخصصو ډاکټرانو په ګډون ۴۸ روغتیایي پرسونل لري- د انتاني ناروغیو (توبرکلوز، کلورا، ملاریا او نورو مکروبي ناروغیو) په برخه کې به د یاد ولایت د اوسېدونکو ۵۰ سلنه ستونزې هوارې شي.
دغه راز، په بادغیس کې د عامې روغتیا مدیریت او د افغانستان ریسرچ کورسونو سرپرست نقیبالله شریفي پژواک ته وویل، د یاد روغتون فعالیت نن پیل شو او تر پنځو میاشتو به دوام ولري او ښايي خدمات یې تمدید شي.
د سرچینې د معلوماتو له مخې، یاد روغتون د روغتیا نړۍوال سازمان په مرسته د ۱۷۸ زره امریکایي ډالرو په لګښت جوړ شوی دی.
هغه زیاته کړه: «دغه روغتون فعال پرسونل لري او ۲۴ ساعته به د انتاني ناروغانو په خدمت کې وي، د اوس لپاره یې پنځه میاشتني لګښتونه د ډونر له خوا ورکړل شوي او ښایي تمدید شي.»
په ورته وخت کې، د بادغیس یو شمېر اوسېدونکي د یاد روغتون له پرانیستلو خوښ دي او د روغتیا په برخه کې د لا ډېرې پاملرنې غوښتنه کوي.
د بادغیس یو اوسېدونکی عبدالغفار د یاد روغتون پرانیستل ښه ګام بولي او له اسلامي امارته هیله لري چې لا ډېر روغتونونه جوړ کړي.
د هغه په خبره، د بادغیس اوسېدونکي اړ دي چې د خپلو ناروغانو درملنې لپاره نورو ولایتونو ته ولاړ شي خو د پرمختللو روغتونونو په جوړېدو سره به یې دا ستونزه هواره شي.
هغه زیاتوي: «خلک د خپلو ناروغانو د درملنې په موخه هرات، کندهار او کابل ولایتونو ته ځي چې دا چاره د خلکو له وسه پورته ده، موږ له اسلامي امارته غواړو، اسانتیاوې راته برابرې کړي څو اړ نه شو چې نورو ولایتونو ته لاړ شو.»
د بادغیس یو بل اوسېدونکی حمیدالله هم د یاد روغتون له پرانیستلو خوښي څرګندوي خو وايي، د دغه روغتون د بسترونو شمېر دې ډېر شي او تل دې فعال وساتل شي.
هغه زیاته کړه، د بستر د زیاتېدو ترڅنګ، دې مجرب ډاکټران او متخصصین هم وګومارل شي څو د روغتیا په برخه کې د خلکو ستونزې هوارې شي.
هغه وایي: «دغه روغتون باید له ۲۰ بستریز نه ۱۰۰ بستریز ته ارتقا وکړي؛ ځکه د بادغیس خلک د خپلو ناروغانو درملنې لپاره اړ دي چې ان پاکستان ته سفر وکړي.»
دا په داسې حال کې ده، د یاد ولایت مرکز په ګډون په ټولو ولسوالیو کې ۵۴ روغتیایي مرکزونه فعالیت کوي چې د کم شمېر خلکو د ستونزو هوارولو ظرفیت لري.
د یاد ولایت اوسېدونکي ډېری وخت د خپلو ناروغانو درملنې په موخه هرات ، کندهار او کابل ولایتونو او یا پاکستان او ایران هېوادونو ته ځي.
غړيYou need to subscribe to view the full article. Please login or register a new account.
