کابل (پژواک، ۲۶ چنګاښ ۱۴۰۲): د سرپرست حکومت رییسالوزراء ملا محمدحسن اخند چې دوه میاشتې مخکې کندهار ته تللی و، نن بېرته کابل ته راستون شو.
دا په داسې حال کې ده چې نوموړی د ناروغۍ له امله د روان ۱۴۰۲ لمریز کال د غویي میاشتې په ۲۶مه کندهار ته تللی و.
د اسلامي امارت د مشر د حکم پر اساس، د ریاستالوزرا سیاسي مرستیال مولوي عبدالکبير د هغه د کفيل په توګه ټاکل شوى و.
د ریاستالوزراء عمومي دفتر نن پر خپله ټوېټرپاڼه د اسلامي امارت د مرستيال ویاند بلال کریمي یوه ویډیو خپره کړې ده.
کریمي په یاده ویډیو کې وايي، رییسالوزراء ملا محمدحسن اخند په کندهار کې له استراحت او درملنې وروسته نن دوشنبې د اسلامي امارت د مشر له هدایت سره سم بېرته پلازمېنې کابل ته راستون شو.
کریمي زیاته کړې، رییسالوزراء ملا محمدحسن به ارګ ته له رسېدو سره سم د رییسالوزراء په توګه د هېواد د چارو لا ښه تنظیم او مدیریت په موخه خپلې دندې ته دوام ورکړي.
په هېواد کې له سیاسي بدلون وروسته ملا محمدحسن اخند د رییسالوزراء او مولوي عبدالکبیر د هغه د سیاسي مرستیال په توګه وټاکل شول.
