هرات (پژواک، ۲ زمری ۱۴۰۲): هرات کې یو شمېر تار تولیدوونکي بهر ته د دغه محصول د صادراتو درېدو له امله اندېښمن دي او وايي، که وضعیت همدا ډول دوام وکړي اړ دي خپلې کارخونه وتړي.
د هغوی په خبره، له هېواده بهر ته د تارو صادراتو درېدل په دغه ولایت کې د تارو بیې ټیټېدو لامل شوی دی.
په هرات کې د تارو تولید یوې کارخونې مسوول سیدحسن حسیني پژواک خبري اژانس ته وویل، د دوی په شرکت کې اوسمهال لږ تر لږه دوه زره او ۶۰۰ کسان د تار تولید په برخه کې کار کوي او له دې لارې د خپلو کورنيو لګښتونه پوره کوي.
نوموړي زیاته کړه، بهرنیو هېوادونو ته د تارو د صادراتو درېدل یې د کاروبار پیکه کېدو لامل شوي او که صادرات بېرته پیل نه شي، دوی اړ دي په یاد ولایت کې د خپلو کارخونو دروازې وتړي.
هغه وویل: «هغه تار چې موږ به په ۶۰۰ افغانیو پلورل، اوس یې څوک په ۳۵۰ افغانیو هم نه اخلي. موږ دوه زره او ۶۰۰ کاګر لرو، نو کله چې زموږ تار ونه پلورل شي، کار مو پيکه کېږي او مجبور یو د خپلو شرکتونو دروازې وتړو.»
هرات کې د نخ بل تولیدوونکی نادر محمدي وايي، شاوخوا یو کال کېږي ۱۵ ټنه پشم یا پنبه یې اخیستي خو د کاروبار نشتوالي له امله یې ګدام کې اچولې دي.
په ورته مهال، هرات کې د تارو تولیدوونکو اتحادیې رییس جمالالدین طاهري وايي، له تېر یوه کال راهیسې بهر ته د نخو صادرات درېدلي دي.
هغه ټینګار کوي چې د تار د صادراتو بندېدو له امله تولیدوونکو او هغه کورنیو ته درانه زیانونه اوښتي چې له دې لارې یې کورني لګښتونه پوره کول.
هغه وايي، له دې امله چې نخ باید په وطني غالیو کې وکارول شي، صادرات یې درېدلي خو دغه کار ګټه نه لري او ټول یې زیانمن کړي.
بلخوا، د هرات د سوداګرۍ او پانګونې خونې مسوولین وايي، د تارو صادرات د وطني غالیو اوبدوونکو په غوښتنه درېدلي دي.
پر همدې حال، د یادې ادارې اجرائیوي آمر محمدیوسف امین وايي، د غالۍ اوبدونکو اتحادیې غوښتنه کړې چې د وطني غالیو په اوبدلو کې کورني پشمي تار کاروي او اړتیا نشته چې داخلي نخ بهر ته صادر شي.
هغه وايي، پر همدې اساس څو چې سواګر او پانګهوال د صنعت او سوداګرۍ او کرنې له وزارتو اجازه ترلاسه نه کړي، د صادراتو اجازه نه ورکول کیږي.
د دغه تولیدي شرکتونو یوې کارکوونکې ماه بيبي له پژواک سره خبرو کې وویل، حکومت باید له دغه صنعته د ملاتړ وکړي او پلور برخه کې يې جدي اقدامات ترسره کړي.
د هغه په وینا، د بازار له پیکه کېدو او د کاروبار شرایطو په سختېدو سره به د زرګونو کورنیو سرپرستانو خپلې دندې له لاسه ورکړي او دغه کار به د دوی د کورنیو پر اقتصادي وضعیت مستقیم اغېز ولري.
له دې ټولو سره سره د تار تولیدوونکي وايي، د پشم او تار صادراتو له درېدو وروسته، په هرات کې د د دغه محصول بیه د پام وړ ټیټه شوې او له اسلامي امارته غواړي څو په هرات کې د غالۍ اوبدونکو له لوري د تار استفادې کچه معلومه کړي او د مخکې په شان د ایران او پاکستان په ګډون ګاونډیو هېواونو ته د پاتې تارو د صادرېدو اجازه ورکړي.
په همدې حال کې، د هرات والي ویاند نثاراحمد الیاس وايي، د اسلامي امارت په واکمنېدو سره نورو هېوادونو ته صادرات ډېر شوي چې په وینا یي، تازه څو ورځې وړاندې په لومړي ځل له هراته د انارو جوس د کراچۍ بندر له لارې امریکا ته صادر شول.
د هغه په خبره، صادرات د اقتصادي ودې لپاره یو مهم ګام او په هېواد کې د کورنیو تولیداتو د لوړ ظرفیت ښودونکي دي او د تار صادراتو درېدو موضوع به د دغه ولایت د ځايي ادارې له لوري وڅېړل شي.
د هرات د والي ویاند څرګنده کړه چې په دې برخه کې به موثر ګامونه پورته شي او په ټولو برخو کې د کورنیو محصولاتو او تولیداتو له صادراتو به ملاتړ دوام ولري څو بهر ته یې د صادراتو لا ښه زمینه برابره شي.
