دوه بې‌پیلوټه الوتکې د روسیې دفاع وزارت ته نږدې له ودانیو سره لګېدلې

<p style="text-align: justify;">[restrict paid="true"]</p>

<p style="text-align: justify;">اټلانټا (پژواک، ۲ زمری ۱۴۰۲): د راپورونو له مخې، د روسیې پلازمېنې مسکو کې د دفاع له وزارت سره نږدې دوه بې‌پیلوټه الوتکې له ودانیو سره لګېدلې او ویجاړې شوې دي.</p>

<p style="text-align: justify;">روسي رسنیو د زمري په ۲مه خبر ورکړی چې دا پېښه د دوشبنې په ورځ سهار شاوخوا څلور بجې شوې ده.</p>

<p style="text-align: justify;">له نږدې دوو میاشتو راهیسې دا دویم ځل دی چې د روسیې پلازمېنه مسکو د بې‌پيلوټه الوتکو بریدونو شاهد دی.</p>

<p style="text-align: justify;">د روسیې ټاس اژانس د ځایي چارواکو  په حواله خبر ورکړی چې د یوې الوتکې ټوټې د مرکزي مسکو په کومسومولسکي واټ کې موندل شوې دي.</p>

<p style="text-align: justify;">دغه ځای د دفاع وزارت له ودانۍ سره شاوخوا دوه کیلومتره واټن لري.</p>

<p style="text-align: justify;">سرچینې زیاته کړې، بله الوتکه همدې سیمه ته نږدې په بل واټ کې پر یوې لوړپوړې ودانۍ چې کاري دفترونه په کې دي، لګېدلي او ودانۍ زیانمنه شوې ده.</p>

<p style="text-align: justify;">د روسیې دولتي اژانسونو راپور ورکړی چې دواړه سړکونه د ترافیکو پر مخ تړل شوي دي.</p>

<p style="text-align: justify;">د روسیې دفاع وزارت پر خپل ټیلګرام چېنل لیکلي، دوه بې‌پیلوټه الوتکې «شنډې او سقوط شوې» او په خبره یې، دغه کار د اوکراین له خوا شوی دی.</p>

<p style="text-align: justify;">اوکراین بیا پر مسکو او د اوکراین په هغو سیمو کې چې روسیې لاندې کړې، په ښکاره د دغه ډول بریدونو مسوولیت نه دی منلی؛ د مسکو ښاروال سیرګي سوبیانین ویلي، دوه بې‌پیلوټه الوتکې نن سهار څلور بجې پر دوو ناهستوګنیزو ودانیو لګېدلي چې په خبره یې "جدي زیان او یا مرګ‌ژوبله" نه لري.</p>

<p style="text-align: justify;">نږدې دوه میاشتې مخکي د جوزا یا غبرګولي میاشتې په لومړیو کې هم پر مسکو د بې‌‎پيلوټه الوتکو بریدونه وشول چې روسیې چارواکو ترهګریز وبلل.</p>

<p style="text-align: justify;">هغه مهال د روسیې چارواکو په وینا، اته بې‌پيلوټه الوتکې د برید په هدف کارول شوې وې چې دوه یې پر ودانیو لګېدلې وې او دوه کسان یې ټپیان کړي وو.</p>

<p style="text-align: justify;">په مسکو کې د بې‌پيلوټه الوتکو تازه برید داسې مهال شوی چې روسي پوځیانو د اوکراین پر بندري ښار اودیسې باندې خپلو هوایي بریدونو ته دوام ورکړی دی.</p>

<p style="text-align: justify;">پرون په دغه ښار کې د روسیې یوه توغندیز برید چې د ارتودوکس کلیسا پر یوې پخوانۍ ودانۍ وشو، یو تن وواژه او ۲۲ نور یې ټپيان کړل.</p>

<p style="text-align: justify;">یادونه: په دغه راپور کې د ازادي راډیو له خبر څخه استفاده شوې ده.</p>

<p style="text-align: justify;">[/restrict]</p>