پلعلم- مهترلام (پژواک، ۴ زمری ۱۴۰۲): حکومتي مسوولين وايي چې سېلابونو په لوګر او لغمان ولايتونو کې خلکو ته درانه مالي زيانونه اړولي دي.
د لوګر کرنې ریاست مطبوعاتي مسوول شاهدالله همراز پژواک ته وویل، د وروستیو اورښتونو له امله د مرکز پلعلم په ګډون په څلور ولسوالیو کې سېلابونو خلکو ته زیانونه اړولي؛ شاوخوا ۷۰۰ جریبه فصلونه یې له منځه وړي دي.
همراز زیاته کړه، سېلابونو ډېری مالی زیانونه په مرکز پلعلم او محمداغې ولسوالیو کې خلکو ته اړولي او په پام کې ده چې د اوښتو زیانونو په اړه د څو ادارو له لوري د ولایت په کچه سروې ترسره شي.
هغه زیاتوي، «سېلابونو په لوګر کې شاوخوا ۷۰۰ جریبه فصلونه لکه پياز، رومیان، لوبیا او کچالو له منځه وړي دي.»
د محمداغې یوه اوسېدونکي محمد نصیر پژواک ته وویل، تېره ورځ د دغې ولسوالۍ په سفیدسنګ او زاهداباد سیمو کې سېلابونه راوتلي وو او خلکو ته یې درانه مالي زیانونه اړولي دي.
نوموړي د لوګر ولایت پر دولتي ادارو غږ وکړ چې له سېلابځپلو کورنیو سره بېړنۍ مرستې وکړي.
دغه راز د يو بل خبر له مخې، په لغمان کې هم سېلابونو زيانونه اړولي دي.
په لغمان کې د پېښو پر وړاندې د چمتوالي ادارې رییس قاري خیرمحمد غازي پژواک ته وویل، تېره شپه د بادپښ ولسوالۍ اړوند اندروړ، ګړوچ او سنځلۍ سیمو کې سېلابونه راوتلي وو چې خلکو ته يې زيانونه اړولي دي.
د غازي په وینا، د يادو سېلابونو له امله ۶۰ جریبه کرنیزه ځمکه، د اوبو سربندونه او شاوخوا ۲۵۰ متره استنادي دېوالونه له منځه تللي او لسګونه اوزې او غواګانې هم تلف شوې دي.
هغه وويل چې د همدې سېلابونو له امله د بادپښ او مرکز مهترلام سړک ډېرې برخې هم ويجاړې شوي چې په اسانه پرې تګ راتګ نه کېږي.
د يادونې ده، په تېرو څو ورځو کې سېلابونو په بېلابېلو ولايتونو کې خلکو ته د مالي زيانونو ترڅنګ ځاني تلفات هم وراړولي دي.
غړيYou need to subscribe to view the full article. Please login or register a new account.
