د پاکستان پنجاب کې لاریون‌کوونکو څلور کلیساوې سوځولې

[restrict paid="true"]

اټلانټا (پژواک، ۲۵ زمری ۱۴۰۲): د راپورونو له مخې، پارېدلو لاریون‌کوونکو د پاکستان پنجاب ایالت کې وروسته له هغه څو کلیساوې وسوځولې چې هلته یوه عیسوي کورنۍ د قران‌کریم پر سوځولو تورنه شوه.

پاکستاني رسنیو خبر ورکړی چې دا پېښه د پنجاب ایالت په فیصل‌اباد ښار کې شوې ده.

د ځايي مسوولینو په وینا، پر كليساګانو بريدونه وروسته له هغه پيل شول چې د "مذهبي توندلارو" یوې ډلې یوه عيسوي كورنۍ قران ته پر سپکاوي تورنه کړه.

د ښار د ژغورنې څانګې ویاند رانا عمران جمیل رسنیو ته ویلي: «د خلکو ترمنځ د قران سوځولو عکسونه او ویډیوګانې شریکې شوې چې غوغا یې رامنځته کړه.»

هغه زیاته کړې، پارېدلو لاریون‌کوونکو څلور کلیساګانې وسوځولې خو د مرګ‌ژوبلې په اړه راپور نه دی ورکړل شوی.

بلخوا جیو ټلوېزیون خبر ورکړی چې لاریون‌کوونکو د عیسویانو یو شمېر کورونه او موټر هم سوځولي دي.

په پاکستان کې د عیسویانو ټولنې یوه خبرپاڼه کې ویلي: «موږ د قانون له پلي‌کوونکو د عدالت او عمل غوښتنه کوو او موږ له ټولو هغو کسانو چې د ټولو اتباعو لپاره عدالت او امنیت تامینوي، غواړو چې سمدستي مداخله وکړي او موږ ته ډاډ راکړي چې زموږ په خپل وطن کې زموږ ژوند ارزښت لري.»

د امریکا غږ د خبر له مخې، مذهب ته سپکاوی په پاکستان کې چې اکثریت وګړي یې مسلمانان دي، یوه ډېره حساسه موضوع ده؛ په ځینو مواردو کې یوازې د کفر تور لګول د تورن کس د وژلو او بلوا جوړېدل کافي دي.

نړۍ کې د مذهبي ازادۍ په اړه د امریکا کمېسیون د ۲۰۲۲ کال په راپور کې ویلي چې په پاکستان کې مقدساتو ته د سپکاوي قوانینو «اسلامپالو افراطیانو» ته توان ورکړی او هڅولي یې دي چې له سزا پرته عمل وکړي او په اسانۍ سره مذهبي اقلیتونه یا هغه کسان په نښه کړي چې مختلف عقاید لري.

د ټولنیز عدالت مرکز معلوماتو له مخې، له ۱۹۸۷ کال راهیسې په پاکستان کې څه باندې دوه زره کسان مذهب ته په سپکاوي تورن شوي او لږ تر لږه ۸۸ یې د خلکو له خوا شکنجه شوي دي.

د بشري حقونو ډلې وايي، په پاکستان کې مقدساتو ته د سپکاوي له قانونه اکثر د شخصي دښمنیو او اقلیتونو په نښه کولو لپاره ناوړه ګټه پورته کېږي.

د راپورونو له مخې، عیسویان د پاکستان د نفوس دوه سلنه برخه جوړوي.

[/restrict]