[restrict paid="true"]
<p style="text-align: justify;">کندهار (پژواک، ۱ وږی ۱۴۰۲): د کندهار ځایي مسوولین وایي، د سره صلیب له خوا د مرستو له بندېدو وروسته د اسلامي امارت د مشرتابه له لوري د کندهار میرویس حوزوي روغتون ته چې له تېرو څو میاشتو راهیسې د درملو او نورو اړینو توکو له کمښت سره مخ و، د هرې میاشتې لپاره ۴۷ میلیون افغانۍ منظور شوې دي.</p>
<p style="text-align: justify;">د کندهار د والي ویاند مولوي محمود عزام د وږي په لومړۍ نېټه پژواک خبري اژانس ته وویل، که څه هم د کندهار والي حاجي ملا شېرین اخند څو ځلې له سره صلیب سره د میرویس روغتون په اړه لیدنې وکړې څو د سره صلیب مرستې د پخوا په څېر دوام پیدا کړي خو هغوی همکارۍ ته زړه ښه نه کړ.</p>
<p style="text-align: justify;">د هغه په وینا، وروسته د میرویس روغتون د درملو او نورو اړتیاوو ارزونه وشوه، د اړتیا وړ مبلغ د مشرتابه له مقام سره شریک شو چې هغه هم د هرې میاشتې لپاره ورته ۴۷ میلیون افغانۍ منظور کړې.</p>
<p style="text-align: justify;">نوموړي زیاته کړه، دغه پیسې به د یوه ځانګړي کوډ له لارې د مالیې وزارت ته د میرویس حوزوي روغتون لپاره سپارل کېږي او د روغتون لپاره به درمل، روغتیايي تجهیزات او نور اړین توکي پېرل کېږي او د کارکوونکو معاشونه به ترې اجرا کېږي.</p>
<p style="text-align: justify;">د کندهار د عامې روغتیا رییس بسمالله باوري هم وايي، دغه پيسې چې منظور شوې د میرویس روغتون ټولې اړتیاوې ورباندې پوره کېږي.</p>
<p style="text-align: justify;">د هغه په وینا، دا چې میرویس روغتون زر بستریز ته اتقاء کړې نو پر مخکني ۸۵۲ بستونو سربېره ۸۳۲ نور تشکیل هم ورته منظور شوی چې ډېر ژر به ورته نور روغتیايي کارکوونکي پر دندو وګومارل شي.</p>
<p style="text-align: justify;">ویل کېږي چې له تېرو شاوخوا دېرشو کلونو راهیسي سره صلیب له میرویس روغتون سره د درملو، روغتیايي توکو او ډاکټرانو د معاشاتو په برخو کې مرسته کوله خو شاوخوا څلور میاشتې کېږي چې سره صلیب په ټول افغانستان کې د روغتیا په برخه کې خپلې مرستې راکمې کړې دي.</p>
[/restrict]
