<p style="text-align: justify;">کابل (پژواک، ۶ وږی ۱۴۰۲): د کانونو او پټرولیم وزارت وایي، د روان کال لړم میاشتې له لومړۍ نېټې وروسته د ډبرو سکرو صادراتي پروسه په خپل لاس کې اخلي او سوداګر د صادراتي مکتوب له لرلو پرته صادارت نه شي کولای.</p>
<p style="text-align: justify;">دغه راز یاد وزارت وایي، د کابل ښاریانو د سون توکو د ستونزې حل لپاره اقدام او کابل ته د ډبرو سکرو د لېږد په اړه له شرکتونو او ملي سوداګرو سره تړون کوي.</p>
<p style="text-align: justify;">د کانونو او پټرولیم وزارت د ډبرو سکرو ټولو سوداګرو ته خبر ورکوي چې د روان کال د لړم میاشتې تر لومړۍ نېټې خپله صادراتي پروسه په عادي ډول مخته یوسي.</p>
<p style="text-align: justify;">سرچېنې لیکلي: «د لړم میاشتې له لومړۍ نېټې وروسته د کانونو او پټرولیم وزارت تصمیم لري چې صادراتي پروسه په خپل لاس کې واخلي. له یادې نېټې وروسته د ډبرو سکرو سوداګر د وزارت صادراتي مکتوبه پرته صادرات نه شي ترسره کولای.»</p>
<p style="text-align: justify;">د افغانستان ډبرو سکرو د صادروونکو شرکتونو ټولنې مشر محمدرسول توتاخېل پژواک خبري اژانس ته وویل چې له دې مخکې به هر شرکت یوازې صادراتي تعرفه اخیسته او وروسته له هغې به یې صادرات کول.</p>
<p style="text-align: justify;">هغه وایي: «کومه پرېکړه چې شوې، په دې اړه د سوداګرو سره مشوره نه ده شوې او فکر کوم د ډبرو سکرو ټول سوداګر به دا پرېکړه چلینج کړي او دا ډېر اوږد بهیر دی.»</p>
<p style="text-align: justify;">هغه وویل چې یاده پرېکړه به په صادراتو منفي اغیزه وکړي او د ډبرو سکرو صادروونکي شرکتونه به په دې اړه خپله عرضپاڼه د کانونو او پټرولیم وزارت ته وسپاري.</p>
<p style="text-align: justify;">د کانونو او پټرولیم وزارت وایي چې د کابل ښاریانو د سون توکو د ستونزو د حل لپاره اقدام کوي.</p>
<p style="text-align: justify;">سرچینه لیکي: «په همدې خاطر ټولو هغو شرکتونو او ملي سوداګرو ته خبر ورکول کېږي چې غواړي کابل ښار ته د ډبرو سکاره انتقال کړي، شرکتونه باید د سکرو ډبرو نوعیت، نرخ، د پېر او پلور او همدارنګه کابل ښار ته یې د راوړلو موده روښانه کړي. د یادونې ده چې د خرڅلاو مسوولیت هم پر خپله غاړه لري او د تخلیه کولو ځایونه د ښاروالۍ له خوا ورته مشخص کېږي.»</p>
<p style="text-align: justify;">خبرپاڼه کې راغلي، هغه شرکتونه او ملي سوداګر چې غواړي په دې پروسه کې برخه واخلي د دې خبر د نشر له نېټې تر لسو کاري ورځو دې خپل معلومات د یاد وزارت د عوایدو ریاست ته وړاندې کړي.</p>
<p style="text-align: justify;">د کانونو وزارت ویلي، شرکتونو او سوداګرو لپاره یې د هر ټن سکرو د پلور په برخه کې یوه اندازه ګټه هم د کانونو او پټرولیم وزارت په پام کې نیولې ده.</p>
