<p style="text-align: justify;">اټلانټا (پژواک، ۱۴ وږی ۱۴۰۲): د افغانستان لوبډلمشر حشمتالله شهیدي وايي چې د سریلانکا پر وړاندې یې لوبډلې ښه لوبه وکړه، دوی پر خپلو لوبغاړو ویاړي، بلخوا مشر روزونکي جاناتن ټروټ ویلي چې د لوبې ګټلو شرایط سم نه وو ورته په ډاګه شوي.</p>
<p style="text-align: justify;">د کرکټ اسیایي جام سیالیو په لړ کې سریلانکا نن افغانستان ته په ماتې ورکولو سره دویم پړاو ته لار پیدا کړه او افغانستان له دغو سیالیو ووت.</p>
<p style="text-align: justify;">سریلانکا افغانستان ته د ۲۹۲ منډو هدف ورکړی و؛ افغانستان هم ښه لوبه وکړه او په ۳۸ اورونو کې یې ۲۸۹ منډې جوړې کړې او لوبه یې د دوو منډو په توپیر وبایلله.</p>
<p style="text-align: justify;">د لوبې ډېری مینهوال د پرلهپسې ماتو له امله د افغانستان پر لوبډلمشر او روزونکو نیوکې کوي خو لوبډلمشر نن له لوبې وروسته وویل چې لوبډلې یې ښه لوبه وکړه او دی پرې ویاړي.</p>
<p style="text-align: justify;">هغه زیاته کړه: «ناهیلی شو، خو موږ سل سلنه هڅه وکړه چې لوبه وګټو، بیا هم پر خپلو لوبغاړو ویاړم، دوی ډېره ښه لوبه وکړه او تر وروستي باله پورې یې مقابله وکړه.»</p>
<p style="text-align: justify;">شهیدي وویل چې له تېرو څو کلونو راهیسې یې لوبډله په یوه ورځنیو نړۍوالو لوبو کې ښه ځلېږي خو په وروستیو څو لوبو کې یې بریا نه ده خپله کړې.</p>
<p style="text-align: justify;">د هغه په وینا، اوس نړۍوال جام ته روان دي، له دې سیالیو یې ډېر څه زده کړي.</p>
<p style="text-align: justify;">بلخوا، له لوبې وروسته د افغانستان مشر روزونکي جاناتن ټروټ په یوه خبري کنفرانس کې وویل چې د ماتې کوم ځانګړی دلیل نه و، هر یوه خپله برخه ادا کړه.</p>
<p style="text-align: justify;">هغه زیاته کړه، راشد او مجیب ښه توپاچونه وکړه، خو دوی باید نور هم پر خپل بالینګ پاملرنه وکړي.</p>
<p style="text-align: justify;">نوموړي وویل چې د اسیایي جام سیالیو مسوولینو او لوبڅارانو له خوا دوی ته د لوبې د ګټلو او بایللو په اړه شرایط او معلومات نه وو ورکړل شوي.</p>
<p style="text-align: justify;">دی وایي: «موږ ته یوازې دومره ویل شوي وو چې په ۳۷،۱ اورونو وګټل شي خو د لوبې په وروستیو کې ۳۸،۱ یو اورونه په ډاګه شول.»</p>
<p style="text-align: justify;">مشر روزونکي ومنله چې په دې سیالیو کې یې ځینو لوبغاړو سمه لوبه ونه کړه، لکه څنګه چې په کار وه، پر دې نتیجو ټول ناهیلي دي.</p>
<p style="text-align: justify;">بلخوا د کرکټ افغان مبصر او ژورنالېست جعفر هاند ویلي، افغانستان باید له سريلانکا سره د دې لوبې پر څاروونکو او مقاماتو عريضه وکړي چې ولې د لوبې ګټلو دقيقه محاسبه یې ورته په وخت سره نه وه سپارلې.</p>
<p style="text-align: justify;">هغه پر فېسبوک لیکلي، کرکټ بورډ باید هغه مسوولین هم جدي وپوښتي چې کم له کمه په ټلوېزیون کې یې د لوبڅارانو دا خبرې نه اورېدې چې چیغې یې وهلې: «که افغانستان د ۳۸م اورو تر څلورم توپ پورې هم شپږیزه ووهي، بل راونډ ته وتلای شي......»</p>
<p style="text-align: justify;">د هغه په وینا، د افغان لوبغاړو دا ښکلې لوبه پر سیند د لاهو کېدو نه وه.</p>
