کابل (پژواک، ۲۷ وږی ۱۴۰۲): د خوړو نړۍوال پروګرام اجرائیوي مدیر ویلي چې دغه سازمان په افغانستان کې د راتلونکې مېلادي میاشتې تېرولو لپاره کافي بودجه نه لري او خبرداری یې ورکړی چې که بودجه ترلاسه نهشي کړاي، اړ دی دغه هېواد پریږدي.
د خوړو نړۍوال پروګرام اجرائیوي مدیر سینډي مککین د امریکا له ایبيسي ټلوېزیون سره خبرو کې ویلي چې دوی په ناهیلهبښونکي وضعیت کې دي او دغه سازمان په تېرو ۶۰ کلونو کې له ترټولو کمې بودجې سره مخ دي.
هغه د کرونا ویروس خپرېدل، اقلیمي بدلونونه او جګړه د خوړو نړۍوال پروګرام د بودجې کمښت لاملونه بللي او زیاته کړې یې ده چې دغه سازمان اړ شوی څو د افغانستان، بنګلهدېش، کنګو ډموکراټیک جمهوریت، هاییتي، اردن، فلسطین، سویلي سوډان، سومالي او سوریې په شان هېوادونو کې د خپلو مرستو کچه د پام وړ ټیټه کړي.
مککین زیاته کړې چې د خوړو نړۍوال پروګرام افغانستان کې د راتلونکې اکتوبر میاشتې تېرولو لپاره کافی بودجه نه لري و ټینګار یې کړی: «څو چې ونه شو کولای د افغانستان لپاره بودجه ترلاسه کړو، باید په بشپړ ډول یې پرېږدو.»
د خوړو نړۍوال پروګرام له دې وړاندې ویلي وو چې افغانستان کې د مرستو رسونې بهیر لپاره یو میلیون امریکايي ډالر بودجې ته اړتیا لري.
