کابل (پژواک، ۱۷ تله ۱۴۰۲): د افغانستان لپاره د ایران سفیر او ځانګړی استازی وایي، د یو شمېر قانوني اقداماتو په ترسره کولو او خنډونو په لرې کولو سره دوی غواړي چې له افغانستانه ایران ته د صادراتو ډېرېدو زمینه برابره کړي.
دا په داسې حال کې ده چې تېره ورځ د ایران ۸۵ کسیزه اقتصادي پلاوی د افغانستان او ایران ترمنځ د سوداګرۍ او اقتصادي اړیکو پیاوړتیا په موخه کابل ته راغلی.
د سوداګرۍ او صنعت وزارت نن په کابل کې د یاد پلاوي سره ګډه ناسته ترسره کړه.
په دې غونډه کې د ایران سفیرحسن کاظم قمي وویل، دوی غواړي چې له افغانستانه ایران ته د صادراتو ډېرېدو زمینه برابره کړي او دا یې پالیسي هم ده.
هغه زیاته کړه، دا په دې پورې اړه لري چې یو شمېر قانوني اقدامات ترسره او خنډونه لرې شي.
نوموړی وایي، د ایران او افغانستان اقتصادي ظرفیتونه داسې دي چې په ټولو برخو کې کولای شي له یو بل سره کار او همکاري وکړي.
دغه راز په دې غونډه کې د سوداګرۍ او صنعت وزارت مرستیال مولوی قدرتالله جمال وویل چې ایران له ډېر پخوا راهیسې له افغانستان سره نږدې ټولنیزې، تاریخي او اقتصادي اړیکې لري.
هغه وویل: «د دوو ګاونډیو هېوادونو په حیث لازم ګڼم چې له یو بل سره نږدې اقتصادي او سوداګریزې اړیکې ولرو، له یو بل سره تجربې شریکې کړو او په ګډه سره د خپلو هېوادونو د اقتصادي پرمختګ لپاره هڅې وکړو.»
هغه وایي چې ایران د افغانستان د یوه ستر سوداګریز شریک په توګه د افغانستان د تجارت او ټرانزیټ لپاره ځانګړی ځای لري.
جمال وویل چې اسلامي امارت او په ځانګړې توګه د سوداګرۍ او صنعت وزارت د دواړو هېوادونو ترمنځ، اقتصادي، صنعتي، ټرانزیټي او په ټوله کې اقتصادي پراختیا او نږدېوالی غواړي.
په دې غونډه کې د افغانستان د سوداګرۍ او پانګونې خونې سرپرست یونس مومند وویل چې په افغانستان کې د کانونو په برخه کې ډېر ظرفیتونه شته او افغان سوداګر حاضر دي چې په دې برخه کې له ایراني سوداګرو سره په ګډه پانګونه وکړي.
نوموړي وویل چې افغان سوداګر غواړي چې په چابهار بندر کې پانګونه وکړي.
هغه وویل چې افغانستان هر ورځ په بېلابېلو برخو کې ډېر صادرات او واردات لري او که ایران غواړي چې چابهار بندر د افغان سوداګرو لپاره په صادراتي او وارداتي بندر بدل شي نو دوی لپاره دې اسانتیاوې برابرې کړي.
دغه راز، په دې غونډه کې د ایراني پلاوي مشر سردارولي یعقوب علي نظري وویل چې افغانستان ته د دغه پلاوي د سفر موخې د اقتصاد، سوداګرۍ او تخنیکي پانګونې په برخو کې د اړیکو پراخول دي.
د یادونې ده، په دې غونډه کې د افغانستان او ایران بېلابېل توکي هم نندارې ته وړاندې شوي وو.
غړيYou need to subscribe to view the full article. Please login or register a new account.
