کابل (پژواک، ۱۷ تله ۱۴۰۲): پېښو ته د رسېدو په چارو کې د دولت وزارت وايي، هرات کې د خونړۍ زلزلې له امله تر خاورو لاندې شوو کسانو د ژغورنې عملیات لا هم روان دي.
وړمه ورځ غرمه مهال هرات او د هرات شاوخوا ولایتونه څو پرلهپسې زلزلو ولړزول، خو زرګونو کسانو ته یې د هرات په زندهجان او غوریان ولسوالیو کې مرګژوبله اړولې ده.
پېښو ته د رسېدو په چارو کې د دولت وزارت ویاند ملا جانان سایق نن له غرمې وروسته په کابل کې خبریالانو ته وویل چې په زلزله ځپلې سیمه کې د ژغورنې عملیات لا هم روان دي.
هغه وایي: «د ماشینونو په مرسته د پېښې په سیمه کې کار روان دی، له لټون او عملیاتو سره هم مهاله د سیمې خلک هم په دې برخه کې مرسته کوي.»
سایق وایي چې زلزلهځپلو ته خوراکي توکي، د څښاک اوبه او لنډمهاله سرپناه برابر شوي دي.
هغه د جزئیاتو له ورکولو پرته وایي، د لومړنیو شمېرو له مخې، تر اوسه د زلزلې له امله له ۴۰۰۰ ډېرو کسانو ته مرګژوبله اوښتې او د تلفاتو په شمېر کې د بدلون احتمال شته.
دی زیاتوي، د زندهجان او غوریان ولسوالیو په ۲۰ کلیو کې ۱۹۸۰ کورونه په بشپړ ډول ویجاړ شوي دي.
دا په داسې حال کې ده چې د هرات د پېښو پر وړاندې د مبارزې ریاست چارواکي وايي، د تېرې شنبې ورځې زلزله کې د دغه ولایت په زندهجان او غوریان ولسوالیو کې ۲۰ کلي په بشپړه توګه ویجاړ شوي، ۲۴۴۵ کسان مړه او ۲۴۴۰ نور ژوبل شوي دي.
تېره ورځ هم د رییسالوزرا ملا محمدحسن په مشرۍ جوړه شوې بېړنۍ غونډه کې د هرات زلزلهځپلو ته د مرستو رسولو لپاره ګډ کمېسیون جوړ شوی او سل میلیونه افغانۍ یې هم دغه ولایت ته لېږلې دي.
سایق وایي، ایران، پاکستان، جاپان، ترکیې، اروپايي ټولنې، ملګرو ملتونو او یو شمېر نړۍوالو سازمانونو د خواخوږۍ څرګندولو ترڅنګ د هرات له زلزلهځپلو سره د مرستې لپاره چمتووالی ښودلی دی.
پېښو ته د رسېدو په چارو کې د دولت وزارت ویاند وویل چې په پاکستان کې مېشتو افغان سوداګرو، پاکستاني سوداګرو او د دغه هېواد خیریه بنسټونو د هرات له زلزلهځپلو سره د ۳۱ میلیونه پاکستانۍ کلدارو مرسته کړې ده.
هغه چې نن له غرمې وروسته شاوخوا درې بجې یې خبرې کولې، وویل چې په زلزلهځپلو سیمو کې د ورکو کسانو لټون لا هم دوام لري.
د راپورونو له مخې، تر اوسه بېلابېلو سرچینو د هرات له زلزلهځپلو سره تر ۳۰۰ میلیون افغانیو د ډېرې مرستې اعلان کړی.
غړيYou need to subscribe to view the full article. Please login or register a new account.
